काठमाडाैं- राजस्थान रोयल्सका अलराउण्डर बेन स्टोक्स जारी ईन्डियन प्रिमियर लिग (आईपीएल)बाट बाहिरिएका छन्।
बायाँ हातको औँला भाँच्चिएपछि उनी प्रतियोगिताबाट बाहिरिएका हुन्। ‘उनको औंला भाँच्चिएकाे छ, जसकारण उनी दुर्भाग्यवश आईपीएलको जारी सत्रबाट बाहिर हुनेछन्,’ राजस्थानले भनेकाे छ।
प्रतियोगिताअन्तर्गत मुम्बईमा सोमबार राति किङ्स इलेभेनविरुद्ध भएको पहिलो खेलमा क्रिस गेलले प्रहार गरेकाे बललाई क्याच आउट गर्न डाइभ गर्नेक्रममा उनकाे औँलामा चोट लागेको थियो।
उक्त खेलमा राजस्थान ४ रनले पराजित भएकाे थियाे। जसमा क्रिस गेलले ४० रन बनाएका थिए।
‘खेलको सुरुमा उनले एक क्याचको अवसर गुमाएका थिए। त्यसपछि उनले लंग अनबाट दैडिएर गेलले प्रहार गरेकाे बल ड्राइभ हानेर समातेका थिए। गेल आउट भएपछि टाेलीसँग खुशी साट्ने क्रममा उनले असहज महसुस गरेका थिए। त्यसपछि एक ओभर मात्रै खेले,’ बेलायती अखबार इन्डिपेन्डेन्टले भनेकाे छ।
राजस्थानले यो सिजनका लागि स्टोक्सलाई साढे १४ करोड भारतीय रुपैयाँमा आबद्ध गरेको थियो। उनको स्थान लिने खेलाडीको बारेमा राजस्थानले कुनै निर्णय गरिसकेको छैन। यद्यपि राजस्थानले स्टोक्सले बाँकी खेलमा मैदानबाहिर रहेर टोलीलाई सहयोग गर्ने जनाएको छ।
‘राजस्थान रोयल्सका सबैले उनलाई रोयल परिवारको एक महत्वपूर्ण सदस्य ठान्छन्। उनकाे स्वस्थ लाभकाे कामना गर्छाैं। हामी खुशी छौं, बेन आफ्नो बहुमूल्य समर्थन प्रदान गर्न टीमसँग निरन्तरता दिन चाहन्छन्। हामी उनकाे सम्भावित विकल्पको बारे छलफल गर्दै छाैं,’ राजस्थानले भनेकाे छ।
यता स्टोक्सको चोटले इङ्ल्यान्डलाई समेत घाटा हुने भएकाे छ। इङ्ल्यान्डले आगामी जुनको पहिलो सातादेखि न्युजिल्यान्डसँग दुई खेलको टेस्ट शृंखला र भारतसँग पाँच खेलको टेस्ट शृंखला खेल्ने कार्यक्रम छ। त्यसपछि टीट्वेन्टी विश्वकप हुँदैछ।
स्टोक्सले टेस्टमा १० शतक र २४ अर्धशतक, एकदिवशीयमा ३ शतक र २१ अर्धशतक तथा टी- २० मा २ शतक र १० अर्धशतक बनाएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
