रंगुन- बर्मेली सेनाले चलाएकाे गाेली लागेर दुई नेपालीभाषीकाे मृत्यु भएकाे छ। भारतसँग सीमा जाेडिएकाे म्यानमारकाे टमूनगरमा बसाेबास गर्ने किशन गाैतम र उनकाे श्रीमती हरिमाया गाैतमकाे मंगलबार गाेली लागेर मृत्यु भएकाे म्यानमार नाउले जनाएकाे छ।
‘उनीहरु मोटरसाइकलमा दुध लिए आएका थिए। उनीहरूलाई पेहे ब्रिजमा गोली हानिएकाे हाे। शवलाई सडक छेउको खाडलमा फ्याँकिएको थियो,’ एक स्थानियले आफ्नो नाम नछाप्ने शर्तमा भने।
उनीहरूको शव एक स्थानीय राहत समूहले निकालेको थियो र अस्पतालको शवगृहमा पठाएको थियो। ती जोडी आमाबुबा र एक छोरी र दुई छोरासँगै म्यानमारमा बसोबास गर्दै आएका थिए।
समाचारमा जनाइएअनुसार ती दम्पतिको शव मंगलबार दिउँसो नेपाली परम्परा अनुसार अन्त्येष्टि गरिएको छ। ‘सेनाले शव कब्जा गर्ने डरले गौतमका परिवारका सदस्यले नेपाली परम्परा अनुरुप मंगलबार दिउँसो शवको अन्त्येष्टि गरेका छन्,’ समाचारमा भनिएको छ।
यता, मंगलबार दिउँसो एक महिला र तीन पुरुष पनि सुरक्षा फौजले गिरफ्तार गरेको थियो। बुधबार बिहान उनीहरु बसिरहेको स्थानमा प्रहरी र सैनिकहरूले छापा मारेको थियो।
‘आज बिहानसम्म कसैमाथि गोली चलाइएको छैन। प्रदर्शनमा सहभागी भएको आशंकामा उनीहरूको घरमा छापा भने हानिएको थियो,’ एक स्थानियले बुधबार भने।
शनिबार प्रदर्शनकारीहरुलाई दबाउन सैनिकहरुले व्यापक दमन गरेका थिए। यता, प्रदर्शनकारीहरु पनि घरेलु बन्दुकसहित सडकमा उत्रिएका थिए। दुई पक्षबीच झडप हुँदा कम्तीमा तीन सिपाहीहरूलाई मारिएको बताइएको छ। उक्त झडपमा दुई प्रदर्शनकारीको पनि मृत्यु भएको छ।
टमूनगरमा ४ सयकाे हाराहारीमा नेपालीभाषी बस्दै आएका छन्। उनीहरु कृषी पेसामा संलग्न छन्। फ्रेबुअरी १ मा ‘कू’ सेनाले सत्ता हातमा लिएपछि टमूनगरका प्राय: बासिन्दा भारत भागेका थिए।
फ्रेबुअरी १ मा ‘कू’ भएदेखि जारी आन्दोलनमा ज्यान गुमाउनेको संख्या ७०१ नाघेकाे छ। यस्तै ३ हजार पक्राउ परेका छन् भने २३ जनालाई मृत्युदण्डको सजाय सुनाइएको छ।
सन् २०२० को नोभेम्बर ८ का दिन भएको निर्वाचन र त्यसको नतिजाप्रति असन्तुष्टि जनाउँदै सेनाले म्यानमारको सत्ता नियन्त्रणमा लिएको थियाे।
सेनाले निर्वाचनका बेला ब्यापक धाँधली भएको दाबी गर्दै आएको छ। उक्त चुनावमा आङ सान सु ची र उनको ‘नेशनल लिग फर डिमोक्यासी’ दल निर्वाचित भएको थियो। निर्वाचन आयोगले धाँधलीको उक्त दाबीलाई खारेज गरिदिएको थियो।
सेनाले सो निर्वाचन निश्पक्ष नभएको दाबी गर्दै फेरि निर्वाचन गराउन भन्दै सत्ता नियन्त्रणमा लिनुपरेको जनाएको छ। सेनाले निर्वाचन गराउने उद्देश्यका साथ एक वर्षका लागि संकटकालसमेत घोषणा गरेको छ।
यस्तै प्रदर्शनकारीले म्यानमारमा मनाइने नयाँ वर्ष अर्थात् थिङग्यानमा समेत प्रदर्शनलाई निरन्तरता दिएका छन्। थिङग्यान अप्रिल १३ देखि १६ सम्म ४ या ५ दिनसम्म मनाइन्छ। थिङग्यान सबैभन्दा महत्त्वपूर्ण पर्व हो। यसका लागि मंगलबारबाट बिदा दिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
