काठमाडाैं- हत्या गरी फरार भएका एक व्यक्ति १८ वर्षपछि पक्राउ परेका छन्। सोमबार बर्दियाबाट खटिएको प्रहरी टोलीले कृपाराम खटिकलाई बढैयाताल गाउँपालिका-३ बाट पक्राउ गरेको हो।
जिल्ला प्रहरी कार्यालय बर्दियाका अनुसार २०६० साल कात्तिक १० गते उनी लगायत ९ जनाले सोही ठाउँ बस्ने जितबहादुर गोदार क्षेत्रीलाई बञ्चरो प्रहार गरेका थिए।
सो मुद्दामा बर्दिया जिल्ला अदालतले २०६८ जेठ १० गते २० वर्ष कैद सजाय तोकेको थियो। यसमा संलग्न अन्यले कैद सजाय बिताएपनि मुख्य व्यक्ति खटिक फरार रहेका थिए।
प्रहरीका अनुुसार हत्या गरेपछि उनी परिवारसहित भारतमा भागेका थिए। उनले करिब ९ वर्षदेखि रुपैडिया, नानपारा लगायतका क्षेत्रमा मजदुरी गर्दै आएको प्रहरीको दावी छ।
‘भारतको रुपैडिया मोहनपुरमा घर बनाई स्थायी रुपमा परिवारसहित उनी बसोबास गरिरहेका थिए,’ प्रहरी प्रमुख, एसपी ईश्वर कार्कीले भने, ‘पछिल्लो समय उनले आफ्नै धानको मिल सञ्चालन गरेर कृषि तथा भैंसी पालनको व्यवसायसमेत सञ्चालन गर्दै आएका थिए।’
उनलाई सोमबार नै जिल्ला अदालत गुलरियामा उपस्थित गराएको थियो। त्यस्तै, जेल चलानसमेत गराइसकेको प्रहरीले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
