काठमाडौं– नेपाल क्रिकेट संघ (क्यान)ले राष्ट्रिय पुरुष र महिला क्रिकेट खेलाडीलाई ‘सेन्ट्रल कन्ट्याक्ट’मा जोड्नका लागि खेलाडी छनोट गर्न समिति गठन गरेको छ।
क्यानले राजुबाबु श्रेष्ठ, सञ्जय राज सिंह र प्रशान्त विक्रम मल्ल रहेको तीन सदस्यीय समिति बनाएको हो। १८/१८ जना पुरुष र महिला क्रिकेट खेलाडीको २०२१ को सेन्ट्रल कन्ट्याक्ट गर्न आगामी मे १५, २०२१ सम्म बोर्डलाई खेलाडीहरू छनोट गर्दै प्रतिवेदन पेस गर्न तीन सदस्यीय समिति गठन गर्ने निर्णय भएको क्यानले विज्ञप्तिमार्फत जनाएको छ।
समितिले एक्सपर्टको रूपमा थप दुई जना सदस्यलाई सेन्ट्रल कन्ट्याक्ट छनोट गर्न आमन्त्रित गर्ने क्यानले जनाएको छ। यस्तै, अप्रिल, २०२१ को तेस्रो हप्तादेखि नेपाली महिला राष्ट्रिय क्रिकेट टिम र उत्तराखण्ड महिला क्रिकेट टिम, भारतबीच टी २० र एक दिवसीय मैत्रीपूर्ण प्रतियोगिता सञ्चालनको तयारी गर्ने निर्णय पनि क्यानले गरेको छ।
यसका साथै क्यानको मूलपानीमा बसेको बैठकले विभिन्न १० निर्णय गरेको छ।
यस्ता छन् बैठकका निर्णय
१. मे, २०२१ को तेस्रो हप्तामा नामिबियासँग एक दिवसीय क्रिकेट सिरिज सञ्चालनको तयारी गर्ने ।
२. अप्रिल, २०२१ को तेस्रो हप्तादेखि नेपाली महिला राष्ट्रिय क्रिकेट टिम र उत्तराखण्ड महिला क्रिकेट टिम, भारत बिच टी२० र एक दिवसीय मैत्रीपूर्ण प्रतियोगिता सञ्चालनको तयारी गर्ने ।
३. यू–१९ राष्ट्रिय क्रिकेट प्रतियोगिताको सञ्चालन गर्न मुख्य प्रायोजक वाइवाइ सँग सम्झौता गर्ने।
४. महिला राष्ट्रिय क्रिकेट टिमको मुख्य प्रशिक्षकमा जगत टमटालाई जिम्मेवारी दिने।
५. १८/१८ जना पुरुष र महिला क्रिकेट खेलाडीहरुको २०२१ को सेन्ट्रल कन्ट्याक्ट गर्न आगामी मे १५, २०२१ सम्म बोर्डलाई खेलाडी छनोट गर्दै प्रतिवेदन पेस गर्न राजुबाबु श्रेष्ठ, सञ्जय राज सिंह र प्रशान्त विक्रम मल्ल गरी ३ सदस्यीय समिति गठन गर्ने । समितिले एक्सपर्टको रूपमा थप दुई जना सदस्यलाई सेन्ट्रल कन्ट्ट्याक्ट छनोट गर्न आमन्त्रित गर्नेछ।
६. राष्ट्रिय खेलकुद परिषद्को सहयोग एवम् नेपाल क्रिकेट संघको आयोजनामा प्रमुख प्रशिक्षक डेभ वाटमोरको कार्यक्रमलाई राष्ट्रिय क्रिकेट टिमको प्रशिक्षणमा असर नपर्ने गरी अन्य प्रदेशहरुमा समेत निरन्तरता दिने।
७. २०२१ को दोस्रो क्वाटरमा अम्पायर, स्कोरर र प्रशिक्षकको लेभल–१ तहको ट्रेनिङ सञ्चालन गर्ने।
८. प्रशिक्षक संघले बोर्डमा पेस गरेको विधानलाई मान्यताका लागि थप अध्ययन गर्दै संघको अर्को बैठकमा पेस गर्ने।
९. संघमा रहेको बेरुजु फर्छ्योटका लागि ३५ दिने सार्वजनिक सूचना निकाल्ने।
१०. संघ अन्तर्गत गठन भएका विभिन्न समितिलाई विधानले तोके बमोजिम कार्य गर्ने गरी पूर्णता दिने।
जसमा अनुशासन समितिको संयोजकमा सैलेश कर्माचार्य, उप–संयोजकमा रतन कठायत, सदस्यहरुमा नारायण अर्याल र अजयवीर पाण्डे, क्रिकेट समितिको उप संयोजकमा दिवाकर घले, सदस्यहरुमा पदम खडका, करण महत्रा र विनय राजभण्डारी, छनोट समितिमा वासुदेव जोशी, एन्टी करप्सन युनिटमा मिलन बस्नेत, कुवेर चन्द र रितेस सिंह, त्यसैगरी महिला क्रिकेट विकास समितिमा उपसंयोजकमा प्रदीप मजगैया, सदस्यहरुमा निरा राजोपाध्याय, जिना श्रेष्ठ, अनिल शर्मालाई मनोनीत गर्ने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
