काठमाडाैं- नेपाल सरकारले सेरम इन्स्टिच्युट अफ इन्डियासँग खरिद गरेको कोरोनाविरुद्धको खोप ‘कोभिशिल्ड’ छिटो उपलब्ध गराउने व्यवस्था मिलाइदिन भारत सरकारसँग आग्रह गरेको छ।
शुक्रबार परराष्ट्रमन्त्री प्रदीपकुमार ज्ञवालीले भारतीय समकक्षी एस जयशंकरसँग टेलिफोन गर्दै उक्त आग्रह गरेका हुन्। त्यस क्रममा उनले नेपालले किनेको १० लाख डोज खोप छिटो उपलब्ध गराइदिन आग्रह गरेको परराष्ट्र मन्त्रालयले जारी गरेकाे विज्ञप्तिमा भनिएकाे छ।
यस्तै दुई पराराष्ट्रमन्त्रीबीच भारत र नेपालमा पछिल्लो समय बढेको कोरोना भाइरस संक्रमण नियन्त्रणको विषयमा पनि छलफल भएको थियो। कोरोना महामारी नियन्त्रणका लागि सहकार्य गर्ने विषयमा दुई मन्त्रीबीच छलफल भएको समेत बताइएकाे छ।
यता भारतीय विदेश मन्त्रीले काेराेना खोपको आपूर्तिसहित महामारीविरूद्ध लडाइँमा नेपाललाई निरन्तर सहयोग गर्ने आश्वासन दिएका छन्।
केही दिन अगाडि भारतले आफ्नाे नागरिकलाई नलगाई अन्य देशलाई काेराेनाविरुद्धकाे खाेप नदिने बताएकाे थियाे। सेरम इन्स्टिच्यूटले भारतमा दैनिक २० लाख कोरोनाविरुद्धकाे खोप उत्पादन गरिरहेको छ। तर, भारतमा पहिलेकाे तुलनामा कोरोना संक्रमण बढेसँगै सेरम इन्स्टिच्युट अहिले खोप उत्पादन बढाउन सरकारले दबाब दिइरहेकाे छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
