तनहुँ जलविद्युत् आयोजना प्रभावितलाई मुआब्जा वितरण सुरु

पूर्वाधार

रासस बिहीबार, चैत २६, २०७७ ०८:०१

प्रतीकात्मक तस्बिर

तनहुँ–एक सय ४० मेगावट विद्युत् उत्पादन क्षमताको तनहुँ जलविद्युत् आयोजनाले प्रसारण लाइनका लागि जग्गा अधिग्रहण गरी प्रभावितलाई मुआब्जा वितरण सुरु गरेको छ।

तनहुँको ऋषिङ गाउँपालिका–१ झापुटारमा रहेको आयोजनाबाट उत्पादित विद्युत राष्ट्रिय प्रसारण लाइनसँग जोड्नका लागि टावर निर्माण गर्नुपर्ने भएकाले विभिन्न स्थानमा गरी आयोजनाले साढे तेइस रोपनी जग्गा अधिग्रहण गरेको थियो।

आयोजनाबाट उत्पादन हुने विद्युत् भरतपुरको सवस्टेशनमा लगेर राष्ट्रिय प्रसारण लाइनसम्म जोड्नका लागि आयोजनाले जग्गा अधिग्रहण गरेको आयोजनाका सहायक निर्देशक भोला शर्माले जानकारी दिए।

दमौलीबाट भरतपुरसम्मको दूरीमा पर्ने सवस्टेशनमा लगेर राष्ट्रिय प्रसारणको लाइनमा जोड्न ट्रान्समिटर प्रसारण लाइनका लागि २२० केभीको विद्युत् उत्पादन गरिएको उनले बताए। आयोजनाले विभिन्न स्थानमा अधिग्रहण गरेको जग्गाको एक करोड ३१ लाख ३४ हजार ५१० मुआब्जा वितरण गर्ने बताइएको छ।

जग्गा अधिग्रहणसँगै भरतपुरसम्मको प्रसारण लाइन निर्माणको काम तीव्र गतिमा भइरहेको आयोजनाका सहायक निर्देशक शर्माले बताए।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।