लण्डन- मानवअधिकार समूह एम्नेस्टी इन्टरनेसनलले रूसी राष्ट्रपति भ्लादिमिर पुटिनका मुख्य आलोचक एलेक्सी नाभाल्नी मृत्युको मुखमा पुगेको बताएको छ। उनलाई कारागारमा अत्यधिक यातना दिइने गरेको उक्त समूहको दाबी छ।
गत महिना जर्मनीबाट रुस फर्किएलगत्तै पक्राउ परेका नाभाल्नीलाई सो समयदेखि हालसम्म हिरासतमै राखिएको छ। उनलाई मस्कोदेखि करिब २०० किलोमिटर टाढा भ्लादिमिर क्षेत्रमा रहेको एक कारागारमा राखिएको बताइन्छ।
एम्नेस्टीका महासचिव एग्नेस क्याल्लमार्डले वार्षिक प्रतिवेदन सार्वजनिक गर्दै भनिन्, ‘रूसी अधिकारीहरूले उनलाई सुस्त मृत्युको मुखमा पुर्याएका छन्। उनको अवस्था अज्ञात रहेको छ।’
उनले रुसले मानव अधिकार उल्लंघन गरिरहेको समेत बताइन्। ‘स्पष्टतः रूसी अधिकारीहरूले उनको अधिकार उल्लंघन गरिरहेका छन्। पहिले नै उनलाई मार्न कोसिस गरिसकेका छन्, उनीलाई यातना दिइँदै छ। यो मानव अधिकार उल्लंघन हो,’ उनले भनिन्।
राष्ट्रपति पुटिनका आलोचक नाभाल्नीलाई करिब सात महिना पहिले साइबेरियाली शहर टोमस्कबाट राजधानी मस्को फर्कनेक्रममा बिमानमै कथितरुपमा विष खुवाइएर कोमामा पुर्याइएको थियो।
तत्कालै उनलाई ओम्स्क अस्पतालमा भर्ना गरिएको थियो। त्यहाँ उपचार सम्भव नभएपछि नाभाल्नीलाई जर्मनी लगिएको थियो। जर्मनीबाट आएलगत्तै उनलाई मस्कोको शेरेमेत्येभो विमानस्थलबाट रुसी अधिकारीले पक्राउ गरेको थियो।
नाभाल्नीलाई दिइएको करिब तीन वर्षीय जेल सजायको अन्तर्राष्ट्रिय रुपमा नै निन्दा भएको छ। ब्रिटेन, फ्रान्स, जर्मनी, संयुक्त राज्य अमेरिका र युरोपियन युनियनले उक्त जेल सजायको निन्दा गर्दै नाभाल्नीलाई तत्काल रिहा गर्न आग्रहसमेत गरिसकेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
