काठमाडौं- हुलाकी राजमार्ग अन्तर्गत निर्माण सकिएका १३ वटा सडक खण्डको उद्घाटन गरिएको छ। बुधबार भौतिक पूर्वाधार तथा यातायात मन्त्रालयमा आयोजित एक कार्यक्रममा निर्माण सकिएका १३ वटा सडक खण्डको उद्घाटन भौतिक पूर्वाधार तथा यातायात मन्त्री वसन्तकुमार नेम्वाङ र नेपालका लागि भारतीय राजदूत विनयमोहन क्वात्राले संयुक्त रूपमा गरेका हुन्।
मध्य तराईलाई सडक सञ्जालसँग जोड्ने उद्देश्यले सरकारले भारत सरकारको सहयोगमा हुलाकी राजमार्ग निर्माण थालेको थियो। २००२ मा हुलाकी राजमार्ग निर्माणका लागि भारत सरकारले सहयोग गर्ने सैद्धान्तिक सहमति दिएको थियो। २००६ मा भारतसँग पहिलो सम्झौता भएपनि २०१० मा मात्रै ठेक्का लागेको थियो।
हुलाकी राजमार्ग आयोजना आर्थिक वर्ष २०६६/६७ मा सुरु भएको थियो। सुरु हुँदा यो आयोजनाको प्रारम्भिक लागत ४७ अर्ब २४ करोड रूपैयाँ थियो भने अहिले बढेर ६५ अर्ब २० करोड रूपैयाँ पुगेको अर्थ मन्त्रालयले सार्वजनिक गरेको आव २०७७/७८ को अर्धवार्षिक समीक्षामा उल्लेख छ।
हुलाकी राजमार्गका लागि यो वर्ष ७ अर्ब १ करोड ५२ लाख विनियोजन भएकोमा ६ महिनामा ३ अर्ब ३४ करोड ३७ लाख खर्च हुँदा भौतिक प्रगति २५.९४ प्रतिशत भएको छ। यो आयोजनालाई सरकारले राष्ट्रिय गौरवका आयोजनामा समावेश गरेको छ।
३ सय किलोमिटर, १, २ र लुम्बिनी प्रदेशमा रहेका १३ खण्डको निर्माणमा भारत सरकाले सहयोग गरेको हो। २०१६ मा सम्झाैता भएको १४ वटा सडक खण्डका लागि भारत सरकाले ८ अर्ब रूपैयाँ सहयोग गरेको थियो।
१४ मध्ये १३ खण्ड निर्माण सकिएको र १ खण्ड निर्माणाधीन अवस्थामा छ। १३ खण्डको कुल लम्बाई ३ सय ५ किलोमिटर रहेको छ। हुलाकी राजमार्ग निर्माण सम्पन गर्न सरकारले तीब्र गतिमा काम गरिरहेको मन्त्री नेम्वाङले बताए।
रक्सौल-काठमाडौं रेलमार्ग निर्माण, जनकपुर-जयनगर रेलमार्ग सञ्चालनको अन्तिम तयारी भइरहेको उनको भनाइ छ। नेपाल-भारत सहयोग अन्तर्गत यो सडक निर्माण भएको र यसले तराई क्षेत्रका नागरिकको जीवनमा सहजता ल्याउने विश्वास भारतीय राजदूत क्वात्राले गरे। यस्तो सहयोगले दुई देशका नागरिकबीचको सम्बन्ध थप प्रगाढ हुने उनको भनाइ छ।
मोतिहारीको पाइपलाइन, रेल सेवा लगायतमा समेत भारत सरकारको सहयोग रहेको र त्यस्ता आयोजना केही सकिने अवस्थामा रहेको र केही तीब्र गतिमा बनिरहेको उनको भनाइ छ। नागरिकको जीवनस्तर विकासका लागि पूर्वाधार निर्माण महत्वपूर्ण हुने क्वात्राले बताए।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।