सरकारलाई संसदीय समितिको निर्देशन : नारायणघाट-बुटवल सडकखण्डको काम तोकिएकै समयमा सक्नू

पूर्वाधार

नेपाल लाइभ शुक्रबार, चैत १३, २०७७ १७:०९

फाइल तस्बिर

काठमाडौं- संसदीय समितिले निर्माणाधीन नारायणघाट-बुटवल सडकखण्डको निर्माण कार्य तोकिएकै समयभित्र सम्पन्‍न हुनेगरी काम अगाडि बढाउन सरकारलाई निर्देशन दिएको छ।

प्रतिनिधि सभाअन्तर्गतको विकास तथा प्रविधि समितिको शुक्रबार बसेको बैठकले नारायणघाट-बुटवल सडकखण्ड आयोजनाको निर्माण कार्य तोकिएको समयभित्रै सम्पन्‍न हुने गरी सुरू गर्न भौतिक पूर्वाधार तथा यातायात मन्त्रालयलाई निर्देशन दिएको हो। पूर्वतयारीबिना काम अगाडि बढाएको निष्कर्ष निकाल्दै समितिले सबै प्रक्रिया पूरा गरी तोकिएकै समयभित्र निर्माण कार्य सम्पन्‍न गर्नेगरी काम सुरू गर्न निर्देशन दिएको हो।

समितिले नेपालमा सञ्‍चालनमा रहेका आयोजनाहरूको होर्डिङ बोर्डलगायतका डकुमेन्टहरू अंग्रेजी भाषामा हुँदा आमनागरिकले नबुझ्‍ने भएकाले नेपाली भाषामा लेख्‍ने व्यवस्था गर्न पनि सरकारलाई निर्देशन दिएको छ।

‘पूर्व-पश्चिम राजमार्ग नेपालको लाइफलाइन भएको र यस राजमार्गबाट ठूलो संख्यामा यात्रुहरू आवतजावत गर्ने भएको हुँदा यस खण्डअन्तर्गत पर्ने निर्माणाधीन नारायणघाट-बुटवल सडकखण्ड आयोजनाको काम पूर्वतयारी बिना अगाडि बढाइएको तथा न्यून क्षमताका निर्माण व्यवसायीबाट काम भइरहेकोले आयोजना समयमा सम्पन्‍न हुन नसक्दा यात्रुहरूले अनावश्यक रूपमा सास्ती व्यहोर्नु परिरहेकाले गुणस्तरीय रूपमा तोकिएको समयमा आयोजना सम्पन्‍न हुनेगरी कार्य अगाडि बढाउन समिति नेपाल सरकार भौतिक पूर्वाधार तथा यातायात मन्त्रालयलाई निर्देशन गर्दछ,’ बैठकका निर्णयहरू सुनाउँदै समितिकी सभापति कल्याणीकुमारी खड्काले भनिन्।

‘साथै, नेपालमा सञ्‍चालन हुने गरेका कतिपय सडक आयोजना तथा अन्य भौतिक पूर्वाधारका आयोजनाहरूको होर्डिङ बोर्ड तथा त्यस्ता आयोजनाहरूको बारेमा लेखिएका डकुमेन्टहरूमा अंग्रेजी भाषा परेको पाइएको हुँदा आयोजनाका बारेमा लेखिएका डकुमेन्टहरू आमनागरिकले स्पष्ट बुझ्‍ने गरी नेपाली भाषामा पनि लेख्‍ने व्यवस्था गर्न, गराउन समिति नेपाल सरकार भौतिक पूर्वाधार तथा यातायात मन्त्रालयलाई निर्देशन गर्दछ,’ निर्णयमा थप भनिएको छ।

समितिले समितिमा रहेका सांसद र कर्मचारीले निकट समयमा नारायणघाट-बुटवल सडक खण्डको स्थलगत अवलोकन भ्रमण गर्ने निर्णयसमेत गरेको छ।

त्यसैगरी पूर्वाधार विकास आयोजनाका सम्बन्धमा समितिमा छलफल भए पनि निष्कर्षमा पुग्न नसकेका कारण विकासका उपयुक्त मोडेलका बारेमा पूर्वाधारविज्ञहरूसँग समितिले कार्यशाला गोष्ठी आयोजना गर्ने निर्णय गरेको सभापति खड्काले बताइन्।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

प्रधानमन्त्री ओली र टर्कीका राष्ट्रपतिबीच टेलिफोन वार्ता

निजीकरण (पहिलो संशोधन) विधेयक पारित

विश्वकै खुसी नागरिक फिनल्यान्डका, नेपाली दक्षिण एसियाकै खुसी