काठमाडौं– तेस्रो संस्करणको राजविराज मेयर कप सप्तरी प्रिमियर लिग क्रिकेटको फाइनलमा बजाज खडक वारियर्स र रुपनी राइडर्सबीच प्रतिस्पर्धा हुने भएको छ।
विवेक यादव कप्तानीको बजाज खडक वारियर्स र कुशल भुर्तेल कप्तानीको रुपनी राइडर्स सप्तरी प्रिमियर लिगको फाइनलमा प्रवेश गरेका हुन्। शुक्रबार प्रतियोगिताको लिग चरणको अन्तिम खेलमा वारियर्सले टिभिएस किंग्स राजविराजलाई २७ रनले पराजित गर्दै फाइनलमा स्थान बनाएको हो। जितसँगै शीर्ष स्थानमा उक्लिँदै वारियर्स फाइनलमा पुगेको हो। उपाधिका लागि शनिबार वारियर्सले राइडर्ससँग प्रतिस्पर्धा गर्नेछ।
राज रंगशालामा सम्पन्न खेलमा वारियर्सले दिएको १८२ रनको लक्ष्य पछ्याउने क्रममा किंग्स राजविराजले पुरै २० ओभरमा ७ विकेट क्षतिमा १५४ रन मात्र बनाउन सक्यो। टिभीएस किंग्सका लागि रोबिन सिंहले अविजित ५१ रन बनाए। सुरज कुर्मीले ३६ रन, प्रशान्त सिंहले २४ रन तथा सोनु अन्सारीले १६ रनकाे योगदान दिए।
वारियर्सका गोमानन्द अमात्य, भुलावन सहानी र अनिल खरेलले समान २–२ विकेट लिए। यसअघि टस जितेर ब्याटिङ गरेको बजाज खडक वारियर्सले निर्धारित २० ओभरमा ४ विकेट क्षतिमा १८१ रन बनाएको थियो।
वारियर्सका लागि ओपनर अनिल शाहले सर्वाधिक ७० रनकाे योगदान दिए। कप्तान विवेक यादवले ३७, निरज यादवले ३२ र पवन सर्राफले १८ रन योगदान दिए।
किंग्स राजविराजको बलिङतर्फ रोबिन सिंह, मेहबुब आलम र दिनेश अधिकारीले समान १–१ विकेट लिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
