काठमाडौं- ग्रिन कफीको नाममा ठगी धन्दा चलाएको आरोपमा दुई जना पक्राउ परेका छन्। प्रहरीको केन्द्रीय अनुसन्धान ब्यूरो (सिआइबी)ले पोखरा महानगरपालिका-१९ घर भएका ४२ वर्षीय आशिष आचार्य र रसियन नागरिक ३० वर्षीय इगोर कुट्सलाई पक्राउ गरेको हो।
आचार्यको नाममा एक कम्पनी दर्ता गरेर उनीहरुले ग्रिन कफीको व्यापार गरेका थिए। उक्त कफी सेवन गरेपछि बिना व्यायाम, बिना डाइटिङ, कुनै साइडइफेक्टबिना एक हप्तामै १३ किलोसम्म मोटोपन घटाउँछ भन्दै अनलाइनमार्फत् विज्ञापन गरेर ठगी गरेको पाइएपछि उनीहरुलाई पक्राउ गरिएको सिआइबीका निर्देशक तथा डिआइजी सहकुलबहादुर थापाले बताए।
नयाँबजार खुशिबुमा टिम वान सप्लायर्स प्रालि खोलेर उनीहरुले ग्रिन कफी भन्दै यसरी ठग्ने गरेको सिआइबीको दाबी छ। गत कात्तिकदेखि उनीहरुले यसरी ठगी गर्दै आएको अनुसन्धानबाट खुलेको सिआइबीका प्रवक्ता एसपी, गंगा पन्तले जानकारी दिइन्।
उनीहरुले ग्रिन कफी प्रतिकेजी ९६० रुपैयाँमा ल्याउने र विभिन्न केमिकल हालेर प्रशोधित गरेपछि प्रतिकेजी २० हजार रुपैयाँदेखि ४० हजार रुपैयाँसम्ममा बिक्री गर्ने गरेको प्रहरीले जनाएको छ। यसरी उनीहरुले १ किलोमै ४० हजार रुपैयाँ नाफा लिई ठगी गर्दै आएका थिए।
उनीहरुले अहिलेसम्म ७ करोड रुपैयाँ बराबरको कारोबार गरिसकेको देखिएको एसपी पन्तले बताइन्। त्योमध्ये २ करोड रुपैयाँ हुण्डीमार्फत् भारत पुगेको र केही रकम भने रसियामा समेत पुगेको सिआइबीले जनाएको छ। यही शैली अपनाएर भारत र रसियामा सेमत ठगी हुने गरेकोले यसको मुख्य योजनाकार रसियन नागरिक रहेको सिआइबीले जनाएको छ।
एक हप्तामै १३ किलोसम्म तौल घटाउने भन्ने विज्ञापन आएपछि सिआइबीले समेत १ किलो ग्रिन कफी किनेर यसको परीक्षण समेत गरेको थियो। तर, विज्ञापनमा दाबी गरेजस्तो कुनै चमत्कार नभएको र चर्को मूल्यमा बिक्री गर्ने गरेको पाइएपछि उनीहरु पक्राउ परेका हुन्। डेढ महिना लामो अनुसन्धानपछि उनीहरु पक्राउ गरेको सिआइबीले पत्रकार सम्मेलनमार्फत् जानकारी गराएको छ।
आचार्यको नाममा कम्पनी दर्ता भएको देखिए पनि यसको मुख्य योजनाकार भने रसियन नागरिक नै रहेको सिआइबीको दाबी। नेपाली ग्राहकलाई विश्वासमा पार्न सम्बनधित व्यक्तिलाई समेत जानकारी नै नदिई समाजका प्रतिष्ठत व्यक्तिदेखि डाक्टरसम्मको फोटो प्रयोग गरेर विज्ञापन बनाउने गरेको देखिएको छ।
उक्त कफी सेवन गरेपछि कुनै चमत्कार नभएको उल्टै रिंगाटा लाग्ने, वान्ता आउने, यौन इच्छा कम हुने मानव स्वास्थ्यमा समेत गम्भीर असर पर्ने गरेको पाइएकाले सोही अनुसार मुद्दा दर्ता गरी कारबाही गरिने सिआइबीले जनाएको छ।
अहिलेसम्म दुई जना उपभोक्ताले यो कम्पनीविरुद्ध उजुरी दिएका छन् भने उपभोक्ता हित संरक्षण मञ्चले समेत उजुरी दिएको सिआइबीले जनाएको छ।
यो कम्पनीमा २० कर्मचारी कार्यरत थिए भने ६ जना डेलिभरी म्यान रहेको पाइएको छ। अनलाइनमार्फत् अर्डर गरेका ग्रिन कफी उनीहरुले सम्बन्धित ठाउँमा पुर्याउने गर्थे। सिआइबीले बिहीबार छापा मार्ने क्रममा भने ४ जना मात्रै कर्मचारी थिए।
प्रहरीले उक्त कम्पनीमा छापा मारेर १२ बोरा अर्थात ६ सय ४४ किलो हरियो कफी, बिक्री गर्ने तयारीमा राखेको १ सय ग्रामको हरियो कफी २ हजार ८ सय २२ प्याकेट, विभिन्न कच्चा पदार्थहरु बरामद गरेको छ।
त्यसैगरी, २५ थान ल्याटप, ३ लाख ९७ हजार नगद, २ थान मोबाइल बरामद गरेको छ। ठूलो संख्यामा ल्यापटप बरामद भएपछि बिटक्वाइन माइनिङ हुने गरेको समेत आशंका गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764222536.png)
-1764221241.png)
-1764146706.png)
-1763721444.png)
-1763559424.jpg)
-1764080971.png)
