काठमाडौं- ‘काठमाडौं मेयर्स कप’ क्रिकेट प्रतियोगिताको उपाधिका लागि दुई विभागीय टिम नेपाल पुलिस क्लब र सशस्त्र प्रहरी बलको एपीएफबीच प्रतिस्पर्धा हुँदैछ। त्रिवी क्रिकेट मैदानमा हुने खेल शनिबार विहान ८ः४५ बजे सुरु हुनेछ।
पहिलोपटक आयोजना भएको काठमाडौं मेयर्स कपको उपाधि जित्ने लक्ष्यमा दुबै टिम छन्। पुलिस लिग चरणको अंक तालिकाको शीर्ष स्थानमा रहँदै फाइनलमा प्रवेश गरेको हो। यता एपीएफ अंक तालिकामा दोस्रो हुँदै फाइनलमा प्रवेश गरेको हो।
पुलिसले चार खेलबाट तीन खेलमा जित र एक खेलमा हारसहित ६ अंक बनाएकाे थियाे। पुलिसले पहिलो खेलमा बागमती प्रदेशलाई दुई रनले पराजित गरेको थियो। तर आफ्नो दोस्रो खेलमा भने एपीएफसँग दुई विकेटले पराजित भएको थियो पुलिस।
तेस्रो खेलमा त्रिभुवन आर्मी क्लबलाई तीन विकेटले पराजित गरेको पुलिसले चौथो तथा अन्तिम खेलमा काठमाडौं मेयर्स एघार टिमलाई १०३ रनले हराउँदै फाइनल यात्रा तय गरेको थियो। पुलिस सन्तुलित र बलियो टिम हो। लिग चरणमा एपीएफविरुद्ध ब्यहोरेको हारको बदला लिने लक्ष्यमा पुलिस रहेको छ।
यता, शरद भेषावकरको कप्तानीमा रहेको एपीएफ अंक तालिकामा दोस्रो हुँदै फाइनलमा प्रवेश गरेको हो। एपीएफले चार खेलमध्ये तीन खेलमा जित र एक खेलमा हार ब्यहोर्दै ६ अंक बनायो। आफ्नो पहिलो खेलमा आर्मीलाई एक विकेटले पराजित गरेको एपीएफले दोस्रो खेलमा पुलिसलाई एक विकेटले नै हराएको थियो। तेस्रो खेलमा भने बागमतीसँग २७ रनले हारेको एपीएफले अन्तिम खेलमा काठमाडौंलाई सात विकेटले हराएको थियो।
दीपेन्द्र र पवनमाथि पुलिसको भर
पुलिसलाई फाइनलसम्म पुर्याउन दीपेन्द्रसिंह ऐरी र पवन सर्राफको भूमिका मुख्य रह्यो। पुलिसले खेलेको चार खेलमध्ये दुई खेलमा दीपेन्द्र ‘प्लेयर अफ द म्याच’ घोषित हुँदा पवन पनि दुई पटक नै ‘प्लेयर अफ द म्याच’ चुनिए।
पहिलो खेलमा बागमतीलाई दुई रनले हराउँदा दीपेन्द्रले चार विकेट लिए। त्यस्तै, एपीएफसँग एक रनले हार्दा पनि दीपेन्द्र उत्कृष्ट खेलाडी सावित भए। उनले शतकसहित १४० रन बनाए। जुन प्रतियोगिताकै पहिलो शतक बन्यो।
एपीएफविरुद्धकै खेलमा ब्याटिङतर्फ ३५ र बलिङतर्फ पवनले पाँच विकेट लिए। आर्मीविरुद्ध ब्याटिङतर्फ २२ र बलिङमा तीन विकेट लिएका पवन नायक बने। त्यसपछि उनले काठमाडौंलाई पराजित गर्दा पनि चार विकेट लिए।
यी दुबै खेलाडी अलराउण्डर भूमिकामा छन्। बलिङमा नचले ब्याटिङमा, ब्याटिङमा नचले बलिङ यी दुबै खेलाडीले राम्रो प्रदर्शन गरिरहेकै छन्। त्यसकारण पुलिसको भर यी दुई खेलमा रहेको छ। यता, एपीएफका लागि भने दीपेन्द्र र पवन हारको कारण बन्न सक्छन्।
एपीएफ क्लबको जितमा ‘टिमवर्क’ देखिएको छ। कुनै एक खेलाडीको उत्कृष्ट प्रदर्शन भन्दा पनि सबै खेलाडीको उतिकै राम्रो प्रदर्शनको कारण टिमले फाइनलसम्मको यात्रा तय गरेको हो।
एपीएफका सन्दीप जोराले दुई अर्धशतक बनाई सकेका छन् भने आशिफ शेख, शरद भेषावकर र सुवास खकुरेलले समान १–१ पटक अर्धशतक बनाएका छन्। टिमलाई आवश्यकता पर्दा सबैको प्रदर्शन राम्रो हुँदै आएको छ।
ब्याटिङमा आशिफ, सन्दीप, सुवास, शंकर राना, शरद, प्रदीप ऐरी जस्ता ब्याट्सम्यानले धानी रहेका छन् भने बलिङतर्फ अविनाश बोहरा, कमलसिंह एरी, बसन्त रेग्मी, भुवन कार्की, अमरसिंह रौटेला लगायत छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
