काठमाडौं– ग्रेट हिमालय क्रिकेट एकेडेमी र एन्जल्स हार्ट एकेडेमी नेपाल पाकिस्तान फ्रेन्डसिप टि– २० क्रिकेट प्रतियोगिताको सेमिफाइनलमा प्रवेश गरेका छन्।
धुम्बाराहीस्थित पाकिस्तान दुतावासको क्रिकेट मैदानमा बुधबार भएको खेलमा जित निकाल्दै ग्रेट हिमालय क्रिकेट एकेडेमीले सेमिफाइनलमा स्थान बनाएको हो। ग्रेट हिमालय समूह ‘सी’ बाट ६ अंकसहित अन्तिम चारमा पुगेको हो।
बुधबार नै भएको अर्को खेलमा पराजित एन्जल्स हार्ट नेट रन रेटका आधारमा समूह ‘डी’ बाट सेमिफाइनल पुग्न सफल भयो।
जित निकाल्ने क्रममा ग्रेट हिमालयले आरएस बिद्यापिठ एकेडेमीलाई पाँच विकेटले पराजित गरेको हो। टस हारेर फिल्डिङमा आएको आरएसले १९.५ ओभरमा अलआउट हुँदै १५३ रन बनाएको थियो।
आरएसका बिजय गौतमले अर्धशतकसहित सर्वाधिक ७५ र अमृत थापाले ४२ रन बनाए। बलिङतर्फ ग्रेट हिमालयका विज्ञान गौतमले तीन विकेट लिँदा मोहम्मद हुसेन र सुशान्त तिमिल्सिनाले २–२ विकेट लिए।
१५४ रनको चुनौतिसहित जवाफि ब्याटिङमा गरेको ग्रेट हिमालय क्रिकेटले १९.२ ओभरमा ५ विकेट गुमाएर लक्ष्य भेटायो।
ग्रेट हिमालयलाई दोस्रो जित दिलाउने क्रममा हेमपन्त श्रीवास्तबले अर्धशतकसहित ५१ रन बनाए। त्यस्तै संगीत बुढाथोकीले ४२ रन जोडे। बलिङतर्फ आरएसका अनुपम पाण्डेले दुई विकेट लिए।
त्यस्तै, दोस्रो खेलमा स्कुल अफ क्रिकेट आठ रनले विजयी भएको छ। टस हारेर ब्याटिङ गरेको स्कुल अफ क्रिकेटले निर्धारित २० ओभरमा १६४ रन बनायो। उसको लागि सर्बोच्च बस्नेतले ५८ रन बनाए। एन्जल्सका लागि निवस कुवरले ३ विकेट लिए।
१६५ रनको चुनौतिसहित जवाफि ब्याटिङमा गरेको एन्जल्स हार्ट क्लब १५६ रनमै समेटियो। उसको लागि मेघराजले सर्बाधिक ३९ रन बनाए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
