काठमाडाैं- सर्वोच्च अदालतले तत्कालीन एमाले र माओवादी केन्द्रको एकीकरणबाट बनेको नेपाल कम्युनिष्ट पार्टी (नेकपा)लाई वैधता नदिएपछि अप्ठेरोमा परेको माधवकुमार नेपाल समूह अब पूर्ववत एमालेमै फर्केर संघर्ष गर्ने ‘मूड’मा पुगेको छ।
नेकपामा पछिल्लो समय प्रधानमन्त्री केपी शर्मा ओलीले नेतृत्व गरेको एक समूह तथा पुष्पकमल दाहाल ‘प्रचण्ड’ र माधवकुमार नेपालले नेतृत्व गरेको अर्को समूह सक्रिय थियो। सर्वोच्च अदालतले नेकपाको नाम सम्बन्धी विवादमा आइतबार फैसला गर्दै साविककै एमाले र माओवादी पार्टी कायम रहने निर्णय सुनाएको थियो।
सर्वोच्चको फैसलाबारे छलफल गर्न अहिले पेरिसडाँडास्थित कार्यालयमा प्रचण्ड-माधव पक्षको स्थायी कमिटी बैठक बसिरहेको छ। बैठकमा सहभागी एक स्थायी कमिटी सदस्यले भने, ‘अब एमालेमै रहेर ओली प्रवृत्तिविरुद्ध संघर्ष गर्ने कुरा भइरहेको छ, सम्भवतः आज त्यही निर्क्योल हुन्छ।’
पेरिसडाँडामा आजको यो बैठक प्रचण्ड-माधव समूहको अन्तिम बैठक हुनसक्ने प्रचण्डनिकट एक स्थायी कमिटी सदस्यले बताए। ‘परिस्थिति यस्तो बन्न गयो कि अब हामीले उहाँहरुलाई भावुक भएर विदाई गर्नुपर्ने अवस्था आएजस्तो छ।’
ओली पक्षधरले पूर्ववर्ती एमाले पार्टी ब्युँताउने गतिविधि अघि बढाइसकेका छन्। ओली साविकको एमालेका अध्यक्ष थिए भने नेपाल वरिष्ठ नेता थिए। यो अवस्थामा माओवादी पार्टी पनि ब्युँतिएमा प्रचण्ड नै अध्यक्ष रहनेछन्।
अहिले पेरिसडाँडामा प्रचण्ड-माधव पक्षका सांसद, कार्यकर्ता पनि उपस्थिति छ्न्।
सर्वोच्चले आइतबार साविक एमाले र माओवादी केन्द्र यथावत रहेको र एकता गर्न चाहे फेरि प्रक्रिया अनुसार जानुपर्ने भन्दै ऋषिराम कट्टेलको पार्टीलाई नै नेकपा कायम गरेको थियो।
सत्तारूढ नेकपामा पुष्पकमल दाहाल ‘प्रचण्ड’ र माधवकुमार नेपालको गठबन्धन थियो। नेकपाको अर्को पक्षको नेतृत्व प्रधानमन्त्री केपी शर्मा ओलीले गरिरहेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
