काठमाडौं– स्पेनिस ला लिगामा एथ्लेटिको मड्रिड र रियल मड्रिडले बराबरी खेलेसँगै ला लिगामा उपाधि भिडन्त रोचक बनेको छ। शीर्ष स्थानमा रहेको एथ्लेटिको मड्रिडको २५ खेलमा ५९, दोस्रोमा रहेको बार्सिलोनाको २६ खेलमा ५६ साथै तेस्रोमा रहेको रियल मड्रिडको २६ खेलमा ५४ अंक रहेको छ।
आइतबार राति भएको खेलमा एथ्लेटिको मड्रिडका लागि लुइस स्वारेजले खेलको १५औँ मिनेटमा दिलाएको अग्रता जितसम्म पुग्न सकेन। खेलको ८८औँ मिनेटमा रियल मड्रिडका लागि करिम बेन्जेमाले बराबरी गोल गरे। रियल मड्रिडविरुद्ध स्वारेजको गोल २०१९ को फेब्रुअरीमा एन्टोनियो ग्रिजम्यानले गरेपछिको पहिलो गोल हो।
एथ्लेटिको मड्रिड २०१४ पछि यसै सिजन लिग उपाधि जित्न नजिक पुगेको हो। यस्तोमा रियल मड्रिडलाई ला लिगामा पछिल्ला ९ खेल हराउन नसकेको एथ्लेटिको मड्रिडले आइतबारको खेलमा लिइसकेको अग्रता पनि जोगाउन सकेन। एथ्लेटिको मड्रिडले रियल मड्रिडलाई हराउन नसकेको खेल संख्या १० पुगेको छ।
जसमा ६ खेल बराबरी भएका छन् भने ४ खेल रियल मड्रिडले जितेको छ। यही सिजनमा भएको पहिलो भेटमा रियल मड्रिडले एथ्लेटिको मड्रिडलाई २–० ले हराएको थियो। गएको शनिबार राति बार्सिलोनाले ओसासुनालाई २–० ले हराएसँगै मर्डिड डर्बीको बराबरी नतिजाले लिग थप रोचक भएको हो।
रियल मड्रिड र एथ्लेटिको मड्रिडका लागि मात्र होइन डर्बीको नतिजा बार्सिलोनाका लागि पनि प्रतीक्षाको विषय बनेको थियो। बराबरीको नतिजापछि एथ्लेटिको मड्रिडका प्रशिक्षक डिएगो सिमोनले सकारात्मक र नकरात्मक दुवै तरिकाले खेललाई हेर्न सकिने प्रतिक्रिया दिए। ‘तपाइँ कसरी हेर्नुहुन्छ भन्नेमा निहीत रहन्छ। हाम्रो बिग्रिएको हिसाबले हेर्ने हो भने उनीहरुले अन्तिम समयमा बराबरी गोल फर्काए। राम्रो विषय हेर्ने हो भने हामीले राम्रो खेलेका हौँ,’ उनले भनेका छन्, ‘पहिलो हाफ हाम्रो नियन्त्रणमा रह्यो, दोस्रो हाफ उनीहरुको। लिगमा अझै धेरै खेल बाँकी छन्। हामीले २० अंकको फरकमा जित्न सक्छौँ भन्ने अनुमान भइरहेको हो र? हामीलाई थाहा छ यो गाह्रो काम हो।’
रियल मड्रिडका प्रशिक्षक जिनेदिने जिदानले आफूहरु उपाधि भिडन्तमा निरन्तर लागिरहने बताएका छन्। ‘एक अंक जोड्न सक्यौँ, हामी लिगको उपाधि जित्ने प्रतिस्पर्धामा नै छौं। मेहनत गरिरहन्छौँ। अझै लिगमा लामो बाटो बाँकी छ, हामी अन्तिमसम्म लडिरहन्छौँ। अवस्था केही खेलमा नै परिवर्तन हुन सक्छ। हामी सक्दो राम्रो गर्ने सोचमा छौँ,’ उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
