काठमाडौं- सम्पत्ति शुद्धीकरण अनुसन्धान विभागको महानिर्देशकको जिम्मेवारी गजेन्द्रकुमार ठाकुरलाई दिइएको छ। प्रधानमन्त्री तथा मन्त्रिपरिषदको कार्यालयले सहसचिव ठाकुरलाई यो जिम्मेवारी दिएको हो।
ठाकुर यसअघि विभागको उपमहानिर्देशक भइसकेका छन्। त्यहाँबाट उनको सरुवा त्रिभुवन अन्तर्राष्ट्रिय विमानस्थल भन्सार कार्यालयमा भएको थियो। ठाकुर विमानस्थलबाट मध्यमस्तरीय करदाता कार्यालय पुगेका थिए।
त्यहाँ करिब एक वर्ष बसेपछि उनको सरुवा आन्तरिक राजस्व विभागमा भएको थियो। आन्तरिक राजस्व विभागमा झक्कप्रसाद आचार्यलाई महानिर्देशक बनाइएपछि ठाकुरको प्रधानमन्त्री तथा मन्त्रिपरिषद कार्यालयमा सरुवा भएको थियो।
प्रधानमन्त्री कार्यालयअन्तर्गत रहेको विभागमा यसअघि सहसचिव रूपनारायण भट्टराई महानिर्देशक थिए। भट्टराईको सरुवा राष्ट्रपति कार्यालयमा भएको छ। ठाकुर उपसचिव हुँदै रौतहटको प्रमुख जिल्ला अधिकारी भएका थिए।
सहसचिव भएपछि उनी केही समय अख्तियार दुरूपयोग अनुसन्धान आयोगमा बसे। २०७५ मा राजस्व अनुसन्धान विभाग र सम्पत्ति शुद्धीकरण अनुसन्धान विभागलाई प्रधानमन्त्री कार्यालय मातहत लगिएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
