काठमाडौं- इंग्लिस प्रिमियर लिग फुटबलमा म्यानचेस्टर युनाइटेडले म्यानचेस्टर सिटीलाई दुई गोलले हराएको छ। याेसँगै सिटीको लगातार २१ खेलको जित यात्रामा विश्रामसमेत लागेको छ।
जितपछि शीर्ष स्थानको सिटीसँग युनाइटेडले अंक दुरी घटाएको छ। खेलको दोस्रो मिनेटमा नै पाएको पेनाल्टीमार्फत ब्रुनो फर्नान्डेसले म्यानचेस्टर युनाइटेडलाई अग्रता दिलाएका थिए। ५०औँ मिनेटमा लुक शोले गोल गर्दै अग्रता दोब्बर पारे।
सिटीका केही प्रयास गोलमा परिणत हुन सकेन। सिटीको लगातारको जितको यात्रामा विश्राम लाग्दा प्रिमियर लिग थप रोचक बनेको छ। अहिले शीर्ष स्थानमा रहेको म्यानचेस्टर सिटीको २८ खेलमा ६५ अंक रहेको छ।
दोस्रो स्थानमा रहेको म्यानचेस्टर युनाइटेडको २८ खेलमा ५४ अंक रहेको छ। लिगमा म्यानचेस्टर युनाइटेडसँगको हारपछि पनि म्यानचेस्टर सिटीको अवस्था बलियो नै रहेको छ।
म्यानचेस्टर युनाइटेडका लागि उपाधिको प्रतिस्पर्धासँगै शीर्ष चारको पहुँच बलियो बनेको छ। २०२० को नोभेम्बरमा टोटनह्यामसँग २–० ले हारेपछि म्यानचेस्टर सिटीको यो पहिलो हार हो। जहाँ सबै प्रतिस्पर्धामा गरेर २८ खेलमा म्यानचेस्टर सिटी अपराजित रहेको थियो।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।