सुवास नेम्वाङको प्रतिक्रिया- ‘अब एमाले र माओवादीको अलग अलग बैठक बसेर निर्णय हुन्छ’

राजनीति

सुवास नेम्वाङको प्रतिक्रिया- ‘अब एमाले र माओवादीको अलग अलग बैठक बसेर निर्णय हुन्छ’

नेपाल लाइभ आइतबार, फागुन २३, २०७७, १६:२५

काठमाडाैं- नेपाल कम्युनिष्ट पार्टी (नेकपा)का स्थायी कमिटी सदस्य एवं तत्कालीन एमालेका नेता सुवासचन्द्र नेम्वाङले नेकपा एकीकरणले मान्यता नपाउने सर्वोच्च अदालतको फैसलाको सम्मान गरेर अघि बढ्ने बताएका छन्।

सर्वोच्चले आइतबार नेकपा नामको विवादमा फैसला सुनाउँदै यो नाम ऋषि कट्टेलको नेतृत्वमा रहने पार्टीको हुने निर्णय गरेको थियो। साथै सर्वोच्चले तत्कालीन एमाले र माओवादी केन्द्रबीचको एकताबाट बनेको नेकपाले मान्यता नपाउने फैसला समेत सुनाएको थियो।

सर्वोच्चले एमाले र माओवादीबीच एकीकरण हुनुपर्ने भए अब पुनः प्रक्रियाअनुसार एकीकरण गर्न–गराउन समेत निर्वाचन आयोगलाई आदेश दिएको थियो।
नेम्वाङले अदालतको फैसलाअनुसार नै अगाडि बढ्ने प्रतिक्रिया दिए। ‘हामी सम्मानित अदालतको सम्मान गर्छौं’, उनले नेपाल लाइभसँग भने।

त्यसो भए अब एमाले र माओवादीबीच पुनः एकीकरण गर्नतिर लाग्नुहुन्छ कि अलग अलग पार्टीको रुपमा अगाडि बढ्नुहुन्छ भन्ने प्रश्नमा नेम्वाङले भने, ‘सर्वोच्चले आ-आफ्नो निर्णय गरेर अघि बढ्नु भनेको छ। मैले यसो गर्छौं र उसो गर्छौं भन्नु फैसलाको सम्मान होइन। अब अलग अलग दलको बैठक बस्छ, अनि कसरी अगाडि बढ्ने भन्ने निर्णय हुन्छ।'

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।