कैलाली- नव बाल बाटिका स्कुल बौनिया र विद्या भूषणले चण्डिका ग्रुप लिटल फ्लावर प्रिमियर लिग (एलपीएल) क्रिकेट प्रतियोगितामा दोस्रो जित निकालेका छन्।
शुक्रबार भएको पहिलो खेलमा नव बाल बाटिकाले रोजी बड्सलाई ८ विकेटले पराजित गर्यो। संघीय प्रहरी इकाई कार्यालय धनगढीको खेल मैदानमा पहिले ब्याटिङ गरेको रोजी बड्सले १५ ओभर २ बलमा अलआउट हुँदै ८० रन बनायो। रोजी बड्सका याकुब मियाले २४ रन बनाए। बाल बाटिकाका विशाल विक्रम केसीले ३, हिमाल बिक र हिमाल मल्लले २/२ विकेट लिए।
रोजी बड्सले दिएको सामान्य लक्ष्य बाल बाटिकाले ९ ओभरमा २ विकेट गुमाएर पुरा गर्यो। बाल बाटिकाका लागि विशाल विक्रम केसीले अविजित २६ रन जोड्दा कमल ओलीले अविजित १५ रन बनाए।
खेलको प्लेयर अफ दि म्याच बाल बाटिकाका विशाल विक्रम केसी चुनिए। प्रतियोगितामा बाल बाटिकाको दोस्रो जित हो।
त्यस्तै, शुक्रबार नै भएको दोस्रो खेलमा विद्या भूषणले धनगढीको त्रिनगर माविलाई ६४ रनको फराकिलो अन्तरले पराजित गर्यो। टस जितेर ब्याटिङ गरेको विद्या भूषणले १७ ओभरमा सबै विकेट गुमाउँदै ९१ रन बनाएको थियो। उसका लागि प्रदीप चन्दले ३६ रन बनाए। त्रिनगरका खड्क नगरकोटीले ३, बसन्त थापा, पदम पनेरु र सुलभ सेवाले २/२ विकेट लिए।
९२ रनको विजयी लक्ष्यसहित जवाफी ब्याटिङ गरेको त्रिनगर ६ ओभर १ बलमा सबै विकेट गुमाउँदै २७ रनमा समेटियो। उसका कुनै पनि ब्याट्सम्यानले दोहोरो अंक छुन सकेनन्। त्रिनगरलाई सस्तैमा समेट्ने क्रममा विद्या भूषणका विरेन्द्र नाथले ६ र शेर मल्लले ४ विकेट लिए। खेलको म्यान अफ द म्याच विद्या भूषणका विरेन्द्र नाथ भए। प्रतियोगितामा विद्या भूषणको पनि दोस्रो जित हो।
प्रतियोगिताअन्तरगत भोलि होलिल्याण्ड र धनगढी नमुना तथा बाल बाटिका र गुरुकुलबीच खेल हुनेछ। प्रतियोगितामा १६ टिमको सहभागिता रहेको छ। विजेताले १ लाख २० हजार पाउने छन्। त्यस्तै उपविजेताले ६० हजार प्राप्त गर्दा सर्वोत्कृष्ट खेलाडीले १० हजार पाउने छन्। उत्कृष्ट ब्याट्सम्यान, बलर र उदयमान खेलाडीले ५/५ हजार पाउने छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
