काठमाडाैं- नेकपा विवादमा पुष्पकमल दाहाल 'प्रचण्ड' र माधवकुमार नेपाल पक्षले निर्वाचन आयोगमा पुगेर दोस्रोपटक बहुमत आफूहरुसँग रहेकाले छिटो वैधानिकताको निर्णय गर्न आग्रह गरेको छ।
शुक्रबार संसदीय दलको बैठक चलिरहेको समयमा निर्वाचन आयोग पुगेर नेकपाका नेताहरुले माघ १२ गते बुझाएको पार्टीको विवरणका आधारमा निर्णय गर्न भनेका छन्। कृष्णभक्त पोखरेल, रामनारायण विडारी, राजेन्द्र पाण्डे र लिलामणि पोखरेल आयोग पुगेर जानकारी गराएका थिए। आयोगलाई प्रचण्ड-माधव पक्षले आफूसँग बहुमत भएको दोस्रोपटक जानकारी गराएको हो।
'आयोगमा प्रस्तुत गरेको निवेदन दाबी तथा पत्रहरुलाई बेवास्ता गर्दै माघ १२ गते दलको अध्यक्षमा पुष्पकमल दाहाल 'प्रचण्ड'को नाममा लेखिएको पत्रमा केवल ४४१ जनाको केन्द्रीय कमिटी सदस्यको पत्रलाई मान्यता दिइएन’, शुक्रबार बुझाएको पत्रमा भनिएको छ, ‘आयोगको तर्फबाट राजनीतिक दल सम्बन्धी ऐन २०७३ को दफा ५१ र नियमावलीको नियम २५ बमोजिम विवरण अध्यावधिक गर्न इन्कार गरिएको छ। यही नै आधिकारिक नेकपा हो।’
राजनीतिक दल सम्बन्धी ऐन २०७३ अन्तर्गत आयोगमा यसअघि नै निवेदन दाबी प्रस्तुत गरिसकेकाले सोही निवेदन संलग्न पार्टीका केन्द्रीय कमिटीका सदस्यहरुको हस्ताक्षरसहित र नागरिकता प्रमाणपत्रहरुको प्रतिलिपिसहित 'अध्यक्ष दाहाल र माधवकुमार नेपाल नेतृत्वको नेपाल कम्युनिष्ट पार्टी (ने क पा ) नै आधिकारिक पार्टी भएकाले संविधान तथा कानुन बमोजिम अविलम्ब विवादको निरुपण पाउन अनुरोधसहित दोस्रो पत्र लेखिएको' पत्रमा उल्लेख छ।
आयोगले यसअघि प्रधानमन्त्री केपी शर्मा ओलीले विस्तार गरेको केन्द्रीय सदस्य र प्रचण्ड-माधव पक्षले गरेको निर्णयलाई कानुनी मान्यता दिन नसकिने निर्णय गरेको थियो। आयोगले नेकपा विभाजन नभएको समेत भनेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791562069.png)
-1786602170.png)
