काठमाडाैं–सरकारी वार्ता टोली र ‘विप्लव’को वार्ता टोलीबीच तीन बुँदे सहमति भएसँगै शुक्रबार नेत्रविक्रम चन्द ‘विप्लव’ सार्वजनिक हुने भएका छन्। दुई पक्षबीच भएको सहमतिसँगै प्रधानमन्त्री केपी शर्मा ओली र ‘विप्लव’ले एउटै मञ्चबाट संयुक्त सम्बोधन गर्ने भएका छन्।
शुक्रबार राष्ट्रिय सभागृहमा विशेष समारोह आयोजना गरिने र सोही समारोहबाट सहमतिको विस्तृत विवरण सार्वजनिक गरिने बताइएको छ। फागुन २१ गते दिउँसो २ बजे विशेष समारोहलाई प्रधानमन्त्री ओली र नेकपा महासचिव ‘विप्लव’ले सम्बोधन गर्न लागेका हुन्। सोही अवसरमा दुई पक्षबीच भएको सहमतिसमेत सार्वजनिक गरिने बताइएको छ।
बिहीबारको वार्तापछि सरकारी वार्ता टोलीका संयोजक एवम् गृहमन्त्री रामबहादुर थापा ‘बादल’ र ‘विप्लव’ समूहको वार्ता टोली संयोजक एवम् प्रवक्ता खड्कबहादुर विश्वकर्माले हस्ताक्षर गरेको संयुक्त प्रेस नोटमा सरकार र विप्लव समूहबीच तीन बुँदे सहमति पत्रमा हस्ताक्षर भएको उल्लेख छ।
‘विप्लव’ नेतृत्वको नेकपाले आफ्ना सम्पूर्ण राजनीतिक क्रियाकलाप शान्तिपूर्ण रुपमा सन्चालन गर्ने तथा सरकारले ‘विप्लव’ समूहमाथि लगाएको प्रतिबन्ध हटाउने सहमति भएको समेत बताइएको छ।
सरकारले आतंककारी गतिविधि गरेको भन्दै २८ फागुन २०७५ मा ‘विप्लव’ समूहमाथि प्रतिबन्ध लगाएको थियो ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
