काठमाडाैं- ललिता निवासको जग्गा प्रकरणमा सहरी विकास तथा भवन निर्माण विभागका तत्कालीन महानिर्देशक (सहसचिव) अशोकनाथ उप्रेती पाँच लाख रुपैयाँ धरौटीमा छुटेका छन्। विशेष अदालत हाजिर भएका उप्रेती बुधबार घरौटीमा छुटेका हुन्।
विशेष अदालतका अध्यक्ष प्रेमराज कार्की र न्यायाधीशहरु शान्तिसिंह थापा र चन्द्रबहादुर सारुको इजलासले उप्रेतीसँग पाँच लाख रुपैयाँ धरौटी माग गरेको थियो। अदालतले मागेको धरौटी बुझाएर उनी रिहा भएका छन्। उनीविरुद्ध अख्तियार दुरुपयोग अनुसन्धान आयोगले ९ करोड ६५ लाख ७६ हजार रुपैयाँ बिगो दाबी गर्दै मुद्दा दायर गरेको थियो।
ललिता निवासको जग्गा हिनामिना गरेको अभियोगमा पूर्वउपप्रधानमन्त्री विजय गच्छदार, पूर्वमन्त्रीहरु चन्द्रदेव जोशी र डम्बर श्रेष्ठ र अख्तियारका पूर्वप्रमुख आयुक्त दिपकुमार बस्न्यातसहित १ सय ७५ जनाविरुद्ध अख्तियारले विशेष अदालतमा मुद्दा दायर गरेको थियो।
तीमध्ये ११० जनालाई भ्रष्टाचारको कसुर र ६५ जनालाई जग्गा जफत गर्ने भन्दै प्रतिवादी बनाइएको छ। बालुवाटारको जग्गा व्यक्तिको नाममा दर्ता गराउने कार्यमा उनीहरुको संलग्नता रहेको अख्तियारको आरोप पत्रमा उल्लेख छ।
हलसम्म १ सय ५० भन्दा धेरै प्रतिवादीहरु हाजिर भएका छन्। विशेष अदालतमा नेपाली कांग्रेसका नेता गच्छादार र मुख्य विचौलिया रामकुमार सुवेदी हाजिर भएका छैनन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
