काठमाडाै–ताप्लेजुङको दोभान बजारका अग्निपीडितलाई दीर्घकालीन पुनःस्थापनाका लागि भूकम्पपीडित सरह सहयोग उपलब्ध गराउनुपर्ने मागसहित गृहमन्त्री समक्ष ज्ञापनपत्र बुझाएको छ। ताप्लेजुङका प्रतिनिधिसभा सदस्य योगेश भट्टराईको नेतृत्वमा दोभान बजार अग्निपीडित राहत तथा सहयोग समिति गठन गरी बुधबार गृहमन्त्री रामबहादुर थापालाई अग्नि पीडितको दीर्घकालीन पुनःस्थापनाका लागि भूकम्प पीडित सरह सहयोगको माग गर्दै ज्ञापन पत्र बुझाइएको हो।
अग्निपीडितका तर्फबाट ज्ञापनपत्र बुझ्दै गृहमन्त्री थापाले पीडितलाई तत्काल १५ हजार राहत उपलब्ध गराइएको र दीर्घकालीन पुनःस्थापनाका लागि कार्यविधि सच्याएर ५ लाख रुपैयाँ दिने बताएका हुन्।
मिरिङदेन गाउँपालिका–३ स्थित दोभान बजारमा भएको आगलागीमा ४९ घर जलेर ध्वस्त भएका थिए भने ७९ परिवार विस्थापित भएका थिए। आगलागीका कारण आवासविहीन हुन पुगेका पीडितलाई तत्काल राहतको व्यवस्था गर्नुपर्ने, पहाडी भेगको बजारमा आगलागीबाट हुने जोखिम र क्षति न्यूनीकरण गर्न दमकल तथा पानी ट्यांकीको व्यवस्थापन गरिदिन तथा आगलागी पीडितका लागि पीडितको हितमा व्यवस्थित सहरी विकास आयोजनाको व्यवस्था गर्न माग गरिएको प्रतिनिधि सभा सदस्य तथा दोभान बजार अग्नि पीडित राहत तथा सहयोग समितिका संयोजक योगेश भट्टराईले बताए।
ज्ञापन पत्र बुझ्दै गृहमन्त्री रामबहादुर थापाले ताप्लेजुङका अग्नि पीडितका लागि राहत र उद्धारको काम सुरु भइसकेको बताए। सोमबार नै टेन्ट, ब्याल्यांकेट पठाइएको र मंगलबार खाद्यान्नलगायत अन्य सामग्री पठाइने उनले बताए। आवासका निम्ति भूकम्प पीडित सरहको मापदण्डका आधारमा आवश्यक रकम उपलब्ध गराउने प्रतिबद्धतासमेत उनले जनाए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1764146706.png)
-1786513116.png)
