काठमाडौं– नेपाल चेम्बर अफ कमर्सले व्यवसायिक भुक्तानीसम्बन्धी समस्या समाधानका लागि व्यवसायीहरूलाई लक्ष्य गरी सचेतनामूलक तथा शिक्षामूलक कार्यक्रमहरू गर्ने भएको छ।
कानुनी व्यवस्था तथा प्रक्रियागत विषयहरू बारे जानकारी अभावका कारण व्यवसायीहरूले झन्झट बेहोर्नु परिरहेकोले उद्योगदेखि खुद्रा व्यवसायसम्मलाई सहभागी गराई सचेतनामूलक कार्यक्रम गर्न लागिएको नेपाल चेम्बर अफ कमर्स, आपूर्ति समितिका सभापति देवेन्द्रभक्त श्रेष्ठले जानकारी दिए। ‘कानुनमा भएका व्यवस्थाबारे राम्रोसँग थाहा नपाउँदा पनि व्यवसायीहरूले अनावश्यक समस्या बेहोरिरहेका छन्,’ उनले भने।
नेपाल प्रहरी, वाणिज्य, आपूर्ति तथा उपभोक्ता संरक्षण विभाग, जिल्ला प्रशासन कार्यालयहरू, स्थानीय सरकार, सरकारी वकिलको कार्यालय लगायतका सरकारी निकाय पनि चेम्बरले गर्ने सचेतना कार्यक्रममा सहभागी हुनेछन्। चेम्बरले व्यवसायमा आउने समस्याका बारेमा कक्षा सञ्चालन, अन्तक्र्रिया लगायतका सचेतनामूलक कार्यक्रम गर्नेछ। राजधानी काठमाडौंसहित अन्य जिल्लामा पनि यी कार्यक्रमहरू गरिनेछ।
नेपाल चेम्बर अफ कमर्सका सदस्य श्रेष्ठको संयोजकत्वमा मंगलबार चेम्बरमा भएको छलफलमा महानगरीय प्रहरी वृत्त, वाणिज्य तथा आपूर्ति विभाग, जिल्ला प्रशासन कार्यालय काठमाडौं, काठमाडौं महानगरपालिका, जिल्ला सरकारी वकिलको कार्यालयका प्रतिनिधिको सहभागिता थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
