काठमाडौं– भौतिक पूर्वाधार तथा यातायात मन्त्री वसन्तकुमार नेम्बाङले नेपालका ठूला नदीहरुमा पानीजहाज सञ्चालन गर्ने विषयमा अध्ययन भइरहेको बताएका छन्।
मंगलबार भारतले दोस्रो संस्करणका रुपमा आयोजना गरेको मारिटाइम इण्डिया समिट २०२१ को मन्त्रिस्तरिय भर्चुअल सेसनलाई सम्बोधन गर्दै मन्त्री नेम्बाङले यस्तो बताएका हुन्।
कर्णाली, नारायणी, कालिगण्डकी तथा कोशी जस्ता मुख्य नदीहरुमा पानीजहाज सञ्चालन गरि भारतसँग जलमार्गमार्फत् व्यापार स्थापित गर्न अध्ययन भइरहेको उनले बताए।
उनले जल यातायात सम्बन्धि विभिन्न सन्धि सम्झौता तथा सम्मेलनहरुमा प्रतिवद्धता जनाएअनुसार व्यवहारमा कार्यन्वयन गर्नतर्फ अग्रसर भएको बताए।
उनले कुनै पनि देश विकसित र समृद्ध हुन यातायात र पारवहन सुविधा आधारभूत पूर्वाधारको रुपमा रहने भन्दै नेपालले यातायातको सबै क्षेत्र हवाईजहाज, रेल, सडक यायातात तथा पारवहन सुविधालाई उच्च प्राथमिकताका साथ अगाडी बढाइएको उल्लेख गरे।
मन्त्री नेम्बाङले नेपाल भूपरिवेष्टितबाट भूजडित देशको रुपमा विकसित भएको समेत बताए। जल यातायात सञ्चालन सम्बन्धि नेपालको प्रयास निक्कै पुरानो भएको मन्त्री नेम्बाङको भनाइ छ। नेपालले पानीजहाज सम्बन्धी ऐन सन् १९७१ पारित गरेको थियो।
विभिन्न कारणले नेपालको पानीजहाज सञ्चालन हुन सकेन। निक्कै लामो समय पछि जल यातायातलाई अहिलेको सरकारले उच्च प्राथमिकताका साथ अगाडी बढाएको मन्त्री नेम्बाङको दाबी छ।
तीनदिनसम्म चल्ने मारिटाइम इण्डिया समिट २०२१ को भारतका प्रधानमन्त्री नरेन्द्र मोदीले उद्घाटन गरेका हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
