काठमाडौं– बाँसबारी क्लबले सहिद स्मारक बी डिभिजन लिगमा जित निकालेको छ। मंगलबार भएको खेलमा बाँसबारीले पुल्चोक स्पोर्ट्स क्लबलाई २–० गोलअन्तरले पराजित गरेको छ।
ललितपुरको सातदोबाटोस्थित एन्फा कम्प्लेक्सको मैदानमा भएको खेलमा बाँसबारीका निशान सुनारले दुबै गोल गरे। निशानकै उत्कृष्ट प्रदर्शनमा बाँसबारीले पुल्चोकविरुद्ध सहज जित निकाल्यो। खेलको पहिलो हाफसम्म गोलरहित बराबरी खेलेको बाँसबारीले दोस्रो हाफमा सुधारिएको प्रदर्शन गर्दै जित निकालेको हो।
खेलको ४८ औं मिनेटमा निशानले गोल गर्दै टिमलाई १–० गोलको अग्रता दिलाए। ६९ औं मिनेटमा निशानले नै व्यक्तिगत दोस्रो गोल गर्दै बाँसबारीलाई २–० गोलको जित दिलाए।
तेस्रो स्थानमा रहेको बाँसबारीले जारी लिगमा छैटौं जित निकालेको छ। आठ खेलमध्ये ६ खेलमा जित निकाल्दा एक खेलमा हार र एक खेलमा बराबरी खेल्दै १८ अंक बनाएको छ।
लिगको पुछारमा रहेको पुल्चोक भने जितविहीन छ। पुल्चोकले आठ खेलमध्ये ६ खेलमा हार र दुई खेलमा बराबरी खैल्दै दुई अंक मात्रै बनाएको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।