फाइल तस्बिर
काठमाडौं- नेपाल कम्युनिस्ट पार्टी (नेकपा) प्रचण्ड–माधव समूहका अध्यक्ष माधवकुमार नेपालले बालुवा पेलेर तेल निस्किनु र केपी ओली सुध्रिनु एउटै भएको टिप्पणी गरेका छन्। शनिबार काठमाडौंमा आयोजित नेकपा प्रचण्ड–माधव समूह निकट शिक्षकहरुको राष्ट्रिय भेलालाई सम्बोधन गर्दै नेपालले ओली सुध्रिन नसक्ने टिप्पणी गरेका हुन्।
अध्यक्ष नेपालले वामदेव गौतम अहिले पनि केपी ओलीलाई सुधार्ने कोसिस गरिरहेको समेत बताए। कुनै बेला स्थायी कमिटी बैठकमा ४० मिनेट बोलेर केपी ओलीको राजीनामा सबैभन्दा पहिला गौतमले नै मागेको उल्लेख गर्दै अहिले फेरि ओलीलाई सुधार्न गौतमले नै कोसिस गरिरहेको तर आफूले 'बालुवा पेलेर तेल निस्किँदैन' भनेर गौतमलाई सुनाएको उनको टिप्पणी छ।
‘दुई तिहाईको संख्यामा भएको ठाउँमा उहाँले तुरुन्तै भङ्ग गरिदिनुभयो। किन भङ्ग गरिदिनुभयो भने मलाई प्रधानमन्त्रीबाट हटाउने भए भनेर। यो प्रधानमन्त्री हटाउने को हो थाहा छ? वामदेव गौतम हो। फेरि उहाँ (प्रचण्ड)लाई दोष जान्छ सबैभन्दा बढी,' नेता नेपालले भेलामा भने।
स्थायी कमिटी बैठकमा ४० मिनेट भाषण गरी वामदेवले केपी ओली जस्तो 'रद्दी' मान्छे धर्तिमा कोही पनि छैन भनेको पनि स्मरण गरेका थिए। 'अब अहिले पनि उहाँ फेरि कोसिस गर्दै हुनुहुन्छ। केपीलाई सुधार्न। अब उहाँ गर्नुहोस् मैले भनेको छु यो बालुवा पेलेर तेल निस्किदैन कोसिस गर्नुहोस्,' नेपालको भनाइ थियो।
अध्यक्ष नेपालले अब केपी ओलीसँग एकताको कुनै सम्भावना नभको पनि स्पष्ट पारे। बरु ओली प्रवृत्तिविरुद्धको आन्दोलनमा सहभागी भएकाहरुबीच सहकार्य गरेर अगाडि बढ्ने उनको भनाइ छ।
‘केपी ओलीसँगको एकताको कुनै सम्भावना छैन। कुनै भ्रममा नपर्नुस्। केपी ओलीका मानिसहरुको आँखामा 'बाम' लगाएर निकालेको आँशुको कुनै अर्थ छैन। ख्याल गर्नुहोला। बाम लगाएर आँशु निकाल्छन् र भित्र कोठामा गएर मुसुमुसु हाँस्छन्। यिनलाई मुर्ख बनाएर पठाइयो भन्छन्। त्यसो भएकोले तपाईहरु यस्ता कुराको भ्रममा नपर्नुस्। अब हामी के गरिरहेका छौं भन्दा सबै जो आन्दोलनमा सहभागी भएकाहरुलाई साथमा लिएर बरु जाऔं। संयुक्त सरकार बनाऔं भनिरहेका छौं,’ उनले भने।
प्रतिनिधि सभा पुनःस्थापना भएपनि पुरै लडाई जित्न बाँकी रहेको पनि अध्यक्ष नेपालले बताए। 'एउटा लडाई जित्यौं, सिङ्गो लडाई जित्न बाँकी छ। एउटा लडाई जितेका छौं अर्को लडाई केपी ओलीलाई प्रधानमन्त्री पदबाट नहटाएसम्म लडाई गर्नुछ,’ उनले भने।
केपी ओलीलाई पूर्वएमालेको कुनै माया नभएको पनि अध्यक्ष नेपालले भनाइ छ। ओलीले अहिले मदनभण्डारी फाउन्डेसनको गुट चलाएको आरोप समेत अध्यक्ष नेपालको छ। ‘केपी ओलीलाई एमालेको कुनै माया छैन। कम्युनिस्ट पार्टीको कुनै माया छैन। केपी ओली भनेको मदन भण्डारी फाउन्डेसन गुटको नेता हुन्,’ उनको टिप्पणी थियो।
बालुवाटारमा बैठक हुँदा उपस्थित नहुने ओली फुर्तिका साथ देश दौडिएको समेत टिप्पणी गरे।
नेपालले भनेका थिए, ‘केपी ओली यो तरिकाले जाँदा पार्टीभित्र उहाँले छलफल बहस बन्द गर्नुभयो। बैठक त्यहीँ छ बालुवाटारमा। बालुवाटार बाहिर कहीँ नजाने मान्छे अहिले हेर्नुहोस् त फुर्ति कहिले कहाँ पुग्या छ, कहिले कहाँ पुग्या छ। बैठक भनेपछि धुम्बाराहीमा नआउने मान्छे अहिले त कुद्या छ कुद्या छ। पार्टीलाई कति मर्यादित ठानेको। आफ्नो पुरै पछिपछि लाग्नुपर्छ भन्ने प्रवृतिको कति पक्षपोशण भएको कुरालाई पुष्टि गर्दैन त्यसले । त्यसैगरी त्यहिं निवास छ, बेडरुम छ, त्यहिं बैठक बसेको छ बैठकमै नआउने। बैठकमा ल्याउनका लागि प्रचण्डले बैठक छोडेर जाने फेरी, कहिलेकाहिं हामीलाई पनि सँगै जाउँन भन्ने। एउटाको शक्तिले पुगेन र दुईवटाले सकिन्छ की भनेर । यस्तो ज्याद्रो मान्छेलाई हामीले चलाउन सकेनौं।’
ओली प्रवृत्तिलाई सबैले त्याग्नुपर्ने नेपालको भनाइ थियो। भेलामा प्रचण्डले पनि सम्बोधन गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791520578.jpg)
-1786602170.png)
