काठमाडाैं- नेकपा अध्यक्ष पुष्पकमल दाहाल 'प्रचण्ड'ले प्रधानमन्त्री केपी शर्मा ओली छलछाम, जालझेल, खुराफात र बेइमानको पर्याय भएको आरोप लगाएका छन्। उनले ओली कम्युनिस्ट आन्दोलनले संर्घष गरेको वर्गको नभई जसविरुद्ध संर्घष गरिएको हो त्यही वर्गको एजेन्ट भएको आरोप समेत लगाए।
उनले प्रधानमन्त्री ओली अर्को वर्गमा पतन भएको बताए। शिक्षक संगठनको राष्ट्रिय भेलालाई शनिबार सम्बोधन गर्दै दाहालले ओलीले आफूले सत्ता पाउन जे पनि सम्झौता गर्ने तर, त्यसको पालना नगर्ने गरेको आरोप लगाए।
‘केपी ओली हाम्रो वर्गमा रहेनन्,’ दाहालले भने ‘ हिजो जुन वर्गविरुद्ध आन्दोलन गरियो अहिले त्यसैको पक्षपोषक भएका छन्।’ सर्वाेच्च अदालतको बहसका क्रममा ओली पक्षका कानुन व्यवसायीहरुले राजा, महाराजा र श्री ३ हरुको अधिकार ओलीलाई भएको भन्ने स्मरण गर्दै दाहालले ओली त्यही वर्गको संरक्षक भएकोमा आश्चर्य र दु:ख लागेको टिप्पणी गरे।
विश्व कम्युनिस्ट आन्दोलनमा यस्ता व्यक्तिले ठूला–ठूला प्रतिगमनलाई साथ दिएको दाहालले बताए। रुसदेखि अन्य देशहरुमा कम्युनिस्ट आन्दोलन समाप्त हुनुमा ओलीजस्तै पात्रहरुको भूमिका रहेको दाहालको दाबी छ।
यही प्रवृत्ति नेपालमा लोकतान्त्रिक गणतन्त्र नै उल्टाउने र कम्युनिस्ट आन्दोलनलाई नै कालो पोत्ने, धब्बा लगाउने गरी आश्चर्यजनक रुपमा देखा परेको उनको टिप्पणी छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।