काठमाडौं– मध्यपुर युथ एसोसिएसनले सहिद स्मारक ‘बी’ डिभिजन लिग फुटबलमा पहिलो जित निकालेको छ। मध्यपुरले सातौं खेलमा आएर जित निकालेको हो।
ललितपुरको सातदोबाटोस्थित एन्फा कम्प्लेक्सको मैदानमा भएको खेलमा मध्यपुरले टुसाल युथ क्लबलाई २–० गोलअन्तरले पराजित गरेको हो।
टुसालविरुद्धको जितमा मध्यपुरका धिरज श्रेष्ठ र कैलाश लामिछाने खत्रीले एक–एक गोल गरे। मध्यपुरले पहिलाे र दोस्रो हाफमा थप एक गोल गर्दै जारी लिगमा पहिलो जित निकालेको हो।
खेलको २३ औं मिनेटमा धिरजले गोल गर्दै मध्यपुरलाई १–० गोलको अग्रता दिलाए। ६० औं मिनेटमा कैलाशले गोल गरेपछि मध्यपुरले टुसाललाई २–० गोलअन्तरले पराजित गरेको हो।
मध्यपुरले जितसँगै सात खेलबाट चार अंक बटुलेको छ। लिगको पुछारदेखि दोस्रो स्थानमा रहेको मध्यपुरले सात खेलमध्ये पाँच खेलमा हार व्यहाेर्दै एक खेलमा जित र एक खेलमा बराबरी खेलेको छ। पराजित टुसाल भने लिगको सातौं स्थानमा छ। टुसालले सात खेलबाट आठ अंक बनाएको छ।
लिगको शीर्ष स्थानमा भने सातदोबाटो युथ क्लब रहेको छ। सातदोबाटोले सात खेलबाट १९ अंक बनाउँदा दोस्रो स्थानमा रहेको खुमलटार युथ क्लबको सात खेलबाट १६ अंक छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
