काठमाडौं- सरकारले ३३ महिनापछि राजस्व अनुसन्धान विभागको महानिर्देशक परिवर्तन गरेको छ। संघीय मामिला तथा सामान्य प्रशासन मन्त्रालयले सार्वजनिक गरेको सहसचिव सरुवा सूचीअनुसार विभागका महानिर्देशक दीर्घराज मैनालीको अर्थ मन्त्रालयमा सरुवा भएको हो।
मैनालीलाई २०७५ जेठ ४ गते विभागको महानिर्देशक बनाइएको थियो। विभागको २०औँ महानिर्देशक बनेका मैनालीको कार्यकालको सबैभन्दा ठूलो उपलब्धि भनेको भेइकल एन्ड कन्साइन्मेन्ट ट्रयाकिङ सिस्टम (भिसिटिएस) सुरुवात र कार्यान्वयन हो। यसैगरी उनले ठूला कारोबारको राजस्व छलीको अनुसन्धान पनि अघि बढाएका छन्।
अर्थ मन्त्रालय मातहत रहेको विभागलाई प्रधानमन्त्री तथा मन्त्रिपरिषदको कार्यालयअन्तर्गत लगेसँगै मैनाली महानिर्देशक भएका थिए। मैनालीसँगै सहसचिव आनन्द काफ्ले पनि अर्थ मन्त्रालय भित्रिएका छन्। उनलाई प्रधानमन्त्री तथा मन्त्रिपरिषद्को कार्यालयबाट अर्थ मन्त्रालय ल्याइएको हो।
उनीहरू बाहिरिँदा अर्थ मन्त्रालयबाट सहसचिवहरू गजेन्द्रकुमार ठाकुर र शिवादेवी दाहाल बाहिरिएका छन्। उनीहरू दुवैलाई प्रधानमन्त्री तथा मन्त्रिपरिषदको कार्यालय लगिएको छ। ठाकुर सम्पत्ति शुद्धीकरण अनुसन्धान विभागको महानिर्देशक हुने चर्चा छ। सम्पत्ति शुद्धीकरण अनुसन्धान विभागका महानिर्देशक रूपनारायण भट्टराईलाई राष्ट्रपति कार्यालयमा पठाइएको छ।
सहकारी रजिष्टार टोकराज पाण्डेको रक्षा मन्त्रालयमा सरुवा भएको छ। दोलखाका प्रमुख जिल्ला अधिकारी रमेश शिवाकोटी अख्तियारमा पुगेका छन्। यातायात व्यवस्था विभागका महानिर्देशक गोगनबहादुर हमालको सरुवा सञ्चार तथा सूचना प्रविधि मन्त्रालयमा भएको छ। उनी सूचना प्रविधि विभागको महानिर्देशक हुने चर्चा छ। कर्णाली प्रदेशको आन्तरिक मामिला तथा कानुन मन्त्रालयका सचिव शोभाकान्त पौडेलको सरुवा पनि सञ्चार मन्त्रालयमै भएको छ।
यसैगरी प्रदेश नं २ को मुख्यमन्त्री कार्यालयमा रहेका भुपाल बरालको सरुवा लगानी बोर्डमा भएको छ। लगानी बोर्डका सहसचिव धर्मेन्द्र मिश्रको सरुवा मधेशी आयोगमा भएको छ। कर्णाली प्रदेशका आर्थिक मामिला मन्त्रालयका सचिव घनश्याम उपाध्यायको सरुवा गृह मन्त्रालयमा भएको छ। वाणिज्य विभागका महानिर्देशक नेत्र सुवेदीको सरुवा संघीय मामिला तथा सामान्य प्रशासन मन्त्रालयमा भएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
