काठमाडौं– समस्याग्रस्त सहकारी व्यवस्थापन समितिले समस्याग्रस्त घोषणा भएका सहकारी संस्थाका ऋणीहरुले अधिकतम १५ प्रतिशत ब्याज भुक्तानी गर्नुपर्ने निर्णय गरेको छ।
समितिको फागुन १० गतेको निर्णयअनुसार कूल कर्जा रकमको साँवा भन्दा ब्याज बढी हुने अवस्था आएमा ऋणीले त्यो भन्दा बढी रकम तिर्नुपर्ने छैन। व्यवस्थापन समितिका सदस्य सचिव केशव पौडेलका अनुसार ऋणीहरुबाट अधिकतम १५ प्रतिशत ब्याज असुल गरिनेछ भने साँवा भन्दा ब्याज बढी भएमा अधिकतम दोब्बरसम्म ब्याज लिइनेछ।
‘समस्याग्रस्त घोषणा भएर व्यवस्थापन समितिको जिम्मामा आएका सहकारीहरुले ऋणीलाई २३ प्रतिशतसम्म ब्याजदरमा कर्जा प्रवाह गरेको देखियो,’ सदस्य सचिव पौडेलले भने, ‘अहिले हामीले औसतमा १५ प्रतिशत ब्याजदर मानेर कर्जा भुक्तानी गर्न सकिने भनेका छौं। प्रवाह भएको कर्जाको साँवा भन्दा ब्याज बढी हुने अवस्था आएमा अधिकतम १ को २ अर्थात साँवा बराबर नै ब्याज तिर्नुपर्ने निर्णय समितिले गरेको छ।’
अहिले सहकारी विभागले सहकारी संस्थाहरुमा सन्दर्भ ब्याजदर १५ प्रतिशत तोकेको छ। त्यही सन्दर्भ ब्याजदरका आधारमा व्यवस्थापन समितिले पनि १५ प्रतिशत मात्रै ब्याज तिर्नुपर्ने व्यवस्था गरेको हो।
सूधिर बस्नेत संचालक रहेको ओरियन्टल कोअपरेटिभ समितिबाट बाहिरिएपछि अहिले ११ वटा सहकारीको सम्पत्ति व्यवस्थापनको काम समितिले गरिरहेको छ।
त्यस्तै व्यवस्थापन समितिले समस्याग्रस्त घोषणा भएका २ वटा सहकारी संस्थाका बचतकर्तालाई रकम फिर्ता गर्ने प्रकृया शुरु गरेको छ। २०७६ वैसाखमा समस्याग्रस्त घोषणा भएर समितिको दायित्वभित्र आएका सोसाइटल बचत तथा ऋण सहकारी र लुःनिभा बचत तथा ऋण सहकारीका बचतकर्ताको रकम फिर्ता गर्न लागेको हो।
‘५० हजार भन्दा कम दायित्व भएका साना बचतकर्ताले पहिले आफ्नो रकम फिर्ता पाउँछन्,’ पौडेलले भने, ‘यी दुई संस्थाका संचालक र ऋणीहरुबाट २ करोड ३० लाख रुपैयाँ असुल भएको छ। यो रकम अर्को हप्ताबाटै निक्षेपकर्तालाई बाँढ्न शुरु गर्छौं।’
५० हजार रुपैयाँ भन्दा कम बचत रहेका सदस्यहरु सोसाइटलमा ९० जना र लुःनिभामा ३५ जना रहेको देखिएको छ।
भूमि व्यवस्था, सहकारी तथा गरिबी निवारण मन्त्रालयले यी दुई संस्थालाई समस्याग्रस्त घोषणा गरेर व्यवस्थापन समितिलाई जिम्मा लगाउँदा सोसाइटलको दायित्व १७ करोड ७४ लाख ९१ हजार रुपैयाँ र लुःनिभाको दायित्व २८ करोड ५४ लाख रुपैयाँ बराबर छ।
समितिले यी दुई संस्थासहित १ दर्जन सहकारीको सम्पत्ति व्यवस्थापनको काम गरिरहेको छ। तर हालसम्म पनि कुनैपनि संस्थाको काम पूर्ण रुपमा फरकफारक भने भइसकेको छैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
