काठमाडौं- नेकपाको केपी शर्मा ओली पक्षका नेता महेश बस्नेतले सर्वोच्च अदालतको फैसलाको आफूहरूलाई अनुमान नरहेको बताएका छन्। यद्यपि, चार-पाँच दिनयता भने आफूहरुलाई पनि शंका लागेको उनले बताए।
'सर्वोच्च अदालतको फैसला यो ढंगले आउँछ भन्ने हामीले अनुमान गरेका थिएनौं। पछिल्ला चार-पाँच दिन यता हामीलाई केही शंका लागेको थियो। तर, यो ढंगले आउला भन्ने हाम्रो अनुमान थिएन', बुधबार राष्ट्रिय युवा संघको कार्यक्रममा बोल्दै उनले भने, 'सर्वोच्च अदातलको फैसला यो ढंगले आइसकेपछि परिस्थिति नयाँ मोडमा गएको छ।'
उनले केपी ओली क्षणिक रुपमा हारेको जस्तो देखिए पनि त्यो दुई/चार दिनको कुरा भएको बताए। उनले प्रतिनिधि सभा विघटनको सिफारिसलाई बदर गर्ने अदालतको फैसलालाई विवादित समेत भन्न भ्याए।
'यो जनताको भावना अनुसारको फैसला होइन। यसले लोकतान्त्रिक पद्धतिलाई स्वीकार गर्दैन। यसले राजनीतिलाई सहज निकासतिर लैजाँदैन', उनले भने, 'अदालतको फैसलालाई हामी सबैले स्वीकार गर्छौं। तर, अदालतले केपी ओलीलाई हराए जस्तो, प्रचण्ड र माधव नेपाललाई जिताएको जस्तो जो देखिएको छ, यो क्षणिक कुरा हो।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
