काठमाडौं– नेकपाका अध्यक्ष पुष्पकमल दाहाल प्रचण्डले प्रधानमन्त्री केपी शर्मा ओलीले राजनीतिक मुद्दा हारिसकेको बताएका छन्। अब उनलाई व्यवहारिक रुपले परास्त गर्नका लागि आफूहरुले नयाँ प्रकारको युद्ध जित्नुपर्ने उनले बताए।
मंगलबार ‘जनयुद्धको हस्ताक्षर’ पुस्तक विमोचन कार्यक्रममा प्रचण्डले अदालतले सही फैसला गर्छ भन्नेमा आफूलाई विश्वास भएको दोहोर्याए।
प्रचण्डले प्रतिनिधि सभा विघटनपछिको संघर्षलाई नयाँ युद्धको नाम दिएका थिए। ‘माओत्से तुङले युद्ध र राजनीतिको परिभाषा गर्नुभएको छ– ‘युद्ध रक्तपातपूर्ण राजनीति हो। राजनीति रक्तपातहीन युद्ध हो।’ हामीले युद्ध मात्रै गरेको भए यहाँसम्म आइपुग्ने थिएनौं। हामीले राजनीति नै गरेका थियौं। यो पुस्तक त्यस्तो बेलामा विमोचन हुँदैछ, जतिबेला हामी प्रतिगमनका विरुद्धको युद्धमा छौं। यो युद्ध रक्तपातपूर्ण छैन। यो रक्तपातहीन युद्ध हो,’ उनले भने।
उनले अहिले एकचोटि फेरि जनयुद्ध र जनआन्दोलनले स्थापित गरेका मूल्य–मान्यता, प्राप्त गरेका उपलब्धिहरुलाई अपहरण गर्ने अपहरणकारीहरुका विरुद्ध एउटा नयाँ प्रकारको युद्धमै रहेको बताए। तर यो युद्ध भने रक्तपातपूर्ण र हिंसात्मक नभएको उनको भनाइ छ।
‘पुस ५ गतेदेखि फागुन ११ गतेसम्म हामी नयाँ प्रकारको युद्ध लडिरहेका छौं। देशव्यापी युद्ध चलिरहेको छ। तपाईं हामी सबै युद्धमै छौं,’ उनले भने, ‘अर्को पक्ष, जसले ७० वर्षदेखिको आन्दोलनका उपलब्धिहरुलाई अपहरण गर्न खोजेको छ, त्योचाहिँ हतियारबद्ध छ। राज्यको शक्ति प्रयोग गरेर दबाउन बल गर्न खोज्दै छ।’
प्रचण्डले आफूहरुले धेरै दुस्ख र मेहनतले पार्टी एकताबद्ध गरेको भए पनि ओलीले त्यसलाई फुटाउन खोजेको बताए।
‘केपीजीले फूटको बाटो रोज्नुभयो। विघटन र विसर्जनको बाटो रोज्नुभयो। उहाँले पार्टीलाई पनि फुट, विघटन र विसर्जनतिर लैजानुभयो। देश, संविधान र लोकतन्त्रलाई पनि विघटन र विसर्जन गर्ने बाटोतिर जानुभयो,’ उनको भनाइ थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1779242627.png)
-1778551198-1778552039.jpeg)
-1764146706.png)
