काठमाडौं- प्रधानमन्त्री कप राष्ट्रिय पुरुष एकदिवसीय क्रिकेट प्रतियोगिताको उपाधिको लागि त्रिभुवन आर्मी क्लब र सशस्त्र प्रहरी बलको एपिएफ क्लबबीच प्रतिस्पर्धा हुने भएको छ। बिहीबार (आज) भएको दोस्रो सेमिफाइनलमा आर्मीले बागमती प्रदेशलाई पराजित गर्दै फाइनलमा पुगेको हो।
त्रिवी क्रिकेट मैदानमा भएको सेमिफाइनलमा आर्मीले बागमतीलाई ९४ रनको फराकिलो अन्तरले पराजित गरेको हो। २३० रनको मध्यम चुनौती पछ्याउँदै ब्याटिङ गरेको बागमतीले ४०.२ ओभरमा सबै विकेटको क्षतिमा १३५ रन मात्रै बनाउन सक्यो। बागमतीका लागि कप्तान ज्ञानेन्द्र मल्लले ४७ रन बनाएपनि जित दिलाउन सकेनन्। त्यस्तै, विपिन आचार्यले २३, नन्दन यादवले २२ र आदिल खानले १० रन बनाए।
बागमतीलाई सस्तैमा समेट्ने क्रममा आर्मीका जितेन्द्र मुखियाले चार विकेट लिए। उनले ८.२ ओभरमा एक मेडनसहित २४ रन खर्चिएर चार विकेट लिए। विक्रम सोबले १० ओभरमा पाँच मेडनसहित २५ रन खर्चिएर तीन विकेट लिँदा सुसन भारीले पनि तीन विकेट नै लिए।
यसअघि टस हारेर पहिले ब्याटिङ गरेको आर्मीले निर्धारित ५० ओभरमा सबै विकेटको क्षतिमा २२९ रन बनाएपछि बागमती प्रदेशले मध्यम लक्ष्य पाएको थियो। आर्मीका राजेश पुलामी मगरले अर्धशतक बनाए। राजेशले ९१ बलमा चार चौका र दुई छक्का प्रहार गर्दै ६५ रन बनाए।
त्यस्तै, भीम शार्कीले ४०, विक्रम सोबले ३५, लोकेश बमले २३ र सुसन भारीले १६ रन बनाए। आर्मीले सुरुवातमा खराब खेलेको थियो। पाँच रन हुँदा अनिल मण्डललाई दुई रनमा गुमाएको आर्मीको पाँच रन हुँदा नै रोहितकुमार पौडेल शुन्यमा आउट भए। त्यस्तै, १७ रन हुँदा तेस्रो विकेटको रुपमा हरि चौहान आउट भएपछि आर्मी दबाबमा आएको थियो। तर, भीम र लोकेशले टिमलाई सम्हालेका थिए।
बलिङतर्फ बागमती प्रदेशका गौतम केसीले पाँच विकेट लिए। उनले १० ओभरमा एक मेडनसहित ६१ रन खर्चिएर पाँच विकेट लिएका थिए। अब आर्मीले चौथो संस्करणको प्रधानमन्त्री कप क्रिकेटको उपाधिका लागि फाइनलमा एपिएफ क्लबसँग प्रतिस्पर्धा गर्नेछ। फाइनल खेल शनिबार हुनेछ।
बुधबार (हिजो) भएको पहिलो सेमिफाइनलमा डिफेन्डिङ च्याम्पियन नेपाल पुलिस क्लबलाई ३० रनले पराजित गर्दै एपिएफ फाइनलमा पुगेको थियो। प्रतियोगिताको विजेताले १० लाख रूपैयाँ नगद पाउने छ। त्यस्तै, उपविजेताले पाँच लाख रूपैयाँ पाउनेछ।
यसअघिसम्मको तीन संस्करणमा प्रधानमन्त्री कपको विजेताले २० लाख र उपविजेताले १० लाख पाउँदै आएको थिए। अन्तर्राष्ट्रिय क्रिकेट परिषद् (आइसिसी) को निलम्बनबाट फुकुवा भएर आएपछि चौंथो संस्करणदेखि प्रधानमन्त्री कपको आयोजना गर्न पाएको नेपाल क्रिकेट संघ (क्यान)ले पुरस्कार राशी आधा घटाएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
-1765273665.jpg)
