काठमाडौं- सशस्त्र प्रहरी बलको एपीएफ क्लबले प्रधानमन्त्री कप राष्ट्रिय पुरुष एकदिवसीय क्रिकेट प्रतियोगिताको पहिलो सेमिफाइनलमा नेपाल पुलिस क्लबलाई २०४ रनको लक्ष्य दिएको छ।
त्रिवि क्रिकेट मैदानमा डिफेन्डिङ च्याम्पियन पुलिसले सामान्य लक्ष्य पाएको हो। टस हारेर पहिले ब्याटिङ गरेको एपीएफले निर्धारित २० ओभरमा ९ विकेटको क्षतिमा २०३ रन बनाउन सक्यो।
एपीएफका लागि शंकर रानाले सर्वाधिक ४४ रन बनाउँदा भुवन कार्कीले ४२, सन्दीप जोराले ३४, सुवाष खकुरेल र कमलसिंह ऐरीले समान १९–१९ रन बनाए। बलिङतर्फ पुलिसका आरिफ शेखले १० ओभरमा एक मेडनसहित ३१ रन खर्चिएर तीन विकेट लिए।
त्यस्तै, ललितनारायण राजवंशी र दीपेन्द्रसिंह ऐरीले समान २–२ विकेट लिए। पुलिसलाई सर्वाधिक तीन विकेट दिलाएका आरिफ शेख भने घाइते हुँदै मैदानबाट बाहिरिएका छन्।
फिल्डिङ गर्ने क्रममा उनको खुट्टामा चोट लागेको थियो। उपचारका लागि उनलाई एम्बुलेन्समा हालेर लगिएको छ। सामान्य विजयी लक्ष्य पछ्याउँदै नेपाल पुलिस क्लबले जवाफी ब्याटिङ थालेको छ। दोस्रो सेमिफाइनलमा बागमती प्रदेश र आर्मीबीच बिहीबार (भोलि) फाइनल प्रवेशका लागि प्रतिस्पर्धा हुनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
