काठमाडौं- आइतबार बिहान ७ बजे बृहत नागरिक आन्दोलनका संयोजक युग पाठकले सामाजिक सञ्जाल ट्वीटरमा सोमबार बालुवाटारमा प्रदर्शन गर्ने विवरणसहितको तस्बिर राखे।
तर त्यसको तीन घण्टापछि पाठकले नेवारी भाषामा मार्चपासमा सहभागी हुन अर्को सूचना सार्वजनिक गरे। क्रमश: पाठकले लिम्बु, थारु, मैथली, भोजपुरी, तामाङ भाषामा मार्चपासमा सहभागी हुन सार्वजनिक सूचना सार्वजनिक गरे।
ती सबै सूचना र तस्बिरमा कमलपोखरीको माटो लगाएर कमलपोखरीदेखि बालुवाटरसम्म मार्चपास गर्ने कुरा उल्लेख छ। तर भाषा भने फरक फरक छन्।
फरकफरक भाषा भए पनि सबैको सन्देश भने एउटै छ। त्यो सन्देश हो - प्रतिनिधि सभा विघटन गर्ने प्रधानमन्त्री केपी शर्मा ओलीको कदमविरुद्ध संघर्ष गर्दै आएको 'बृहत नागरिक आन्दोलन' ले सोमबार २ बजे कमलपोखरीमा भेला भएर त्यहाँबाट बालुवाटरसम्म मार्चपास गर्ने।
पाठकले नागरिक आन्दोलनलाई देश अनुसारकै बनाउन विभिन्न भाषामा आह्वान गरिएको बताए।
'हामीले नागरिक आन्दोलनलाई यो देश जस्तो छ, त्यस्तै बनाउन खोजिरहेका छौं। त्यसैले विभिन्न भाषाहरुमा आह्वान गरेका हौं। अहिले हामीसँग जुनजुन भाषाका साथीहरु उपलब्ध हुनुभयो, त्यसको सीमाहरु सहित आह्वान गरिरहेका छौं,' उनले भने।
उनका अनुसार यसप्रकारको आह्वान र आन्दोलनका कार्यक्रमले २०६२/६३ पछिको नेपाली समाजलाई बुझ्ने ज्ञान, राजनीतिलाई बुझ्ने ज्ञान, राजनीति र राज्यको पुनर्संरचना गर्ने ज्ञानलाई नागरिक आन्दोलनले आत्मसात गर्छ।
सोमबार हुने कार्यक्रममा कमलपोखरी बचाउ अभियानका अभियन्ताहरुबाट माटोको टीका लगाएर कमलपोखरीबाट बालुवाटारसम्म मार्चपास हुने छ। मार्चमा कलात्मक प्रस्तुति पनि हुनेछन्।
नागरिक अभियानले यसअघि माइतीघर र प्रज्ञा प्रतिष्ठानमा विभिन्न सांस्कृतिक प्रस्तुतिसहितको विरोध प्रदर्सन गरेको थियो। देसका परम्परागत बाजागाजा, गीतसंगीत तथा अन्य सांस्कृतिक कार्यक्रम मार्फत प्रतिनिधि सभा विघटनको विरोध गर्दै आएको अभियानले बालुवाटारमा अर्को चरणको कार्यक्रम गर्न लागिएको पाठकले जानकारी दिए।
'विभिन्न समुदायको सांस्कृतिक प्रस्तुतिसहित माइतीघरमा प्रतिगमनको विरोध गरेका थियौं। त्यसकै निरन्तरता हो। अर्को रुप हो। त्यसले प्रतिगमनलाई पराजित गरेर अग्रगमनतिर बढाउँछ भन्ने हाम्रो मान्यता हो', उनले भने।
निरंकुशता, स्वेच्छाचारिता र प्रतिगमनको बिम्ब बनेको बालुवाटारलाई चुनौती दिन बालुवाटारमै प्रदर्शन गर्ने कार्यक्रमको घोषणा गरेको पनि पाठकले जानकारी दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
