काठमाडौं- सीडीयस एण्ड क्लियरिङ्ग लिमिटेडले आइतबारदेखि पूँजीबजारमा धितोपत्रको कारोबार सम्बन्धी नयाँ व्यवस्था लागू गरेको छ। धितोपत्र कारोबारको राफसाफ चक्र हाल कायम रहेको ‘टी प्लस थ्री’ लाई घटाएर ‘टी प्लस टु’ कायम भएको हो।
टी प्लस टु व्यवस्था अनुसार अब धितोपत्रको कारोबार भएको थप एक कार्यदिनभित्र धितोपत्र दलालहरुले खरिद–बिक्री हिसाब मिलान गरिसक्नुपर्नेछ।
त्यस्तै, धितोपत्रको बिक्री गरिसकेपछि लगानीकर्ताहरुले आफूले बिक्री गरेको धितोपत्रको भारित औसत लागत (वेयटेज एभरेज कस्ट) गणना गर्ने र बिक्री गरेको धितोपत्र कारोबार भएको दिन बाहेक थप एक कार्यदिनभित्र त्यसको राफसाफ गरिसक्नुपर्नेछ।
कुनै कारणवश बिक्री गरेको धितोपत्र पछिल्लो दिनको १२ बजेभित्र दलाल व्यवसायीको पुल खातामा हस्तान्तरण नभएमा धितोपत्र संख्याको बिक्री रकमको २० प्रतिशत रकम ‘क्लोजआउट’का रुपमा जानेछ।
तोकिएको समयमा राफसाफ नहुँदा धितोपत्र बिक्री गर्ने लगानीकर्ताले पनि २० प्रतिशत रकम जरिवानास्वरुप तिर्नुपर्ने र यो रकम निजको खाताबाट काटिनेछ।
त्यसैगरी, धितोपत्रको खरिद कारोबार गर्ने लगानीकर्ताले आफूले खरिद गर्ने कुल अनुमानित रकमको धितोपत्र व्यवसायीले तोकेको प्रतिशतले हुन आउने रकम खरिद आदेश राख्नुपूर्प नै विद्युतीय माध्यमबाट अग्रिम रुपमा भुक्तानी गर्नुपर्नेछ।
कारोबार भइसकेपछि बाँकी रकम अर्को दिनभित्र अनिवार्य रुपमा विद्युतीय माध्यमबाट भुक्तानी गर्नुपर्नेछ। तर, समयमा खरिद रकम भुक्तानी नगरेमा खरिद भइसकेको धितोपत्र नेप्से तथा सीडीएस एन्ड क्लियरिङको अनुमति लिएर धितोपत्र दलाल कम्पनीले बेच्न सक्नेछ।
त्यतिमात्र नभई सो अवधिभित्र व्यवसायीले बहन गर्नुपर्ने थप लागत पनि सम्बन्धित लगानीकर्ताबाटै असुलउपर गरिनेछ। नेपाल धितोपत्र बोर्डले यसअघि नै दुई कारोबार दिनमा धितोपत्रको कारोबार राफसाफ हुने व्यवस्था गर्न निर्देशन जारी गरेपनि ब्रोकरहरूले लगानीकर्ताले सेयर किनेको एक साताभन्दा बढी अवधिमा मात्र राफसाफ गर्ने गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
