काठमाडौं–प्रधानमन्त्री केपी शर्मा ओलीविरुद्धको आन्दोलनमा मोर्चा बनाउने विषयमा नेकपा अध्यक्ष पुष्पकमल दाहाल‘प्रचण्ड’ र जनता समाजवादी पार्टी (जसपा) का संघीय परिषद् अध्यक्ष डा बाबुराम भट्टराईबीच श्रृंखलाबद्ध भेटघाट हुन थालेका छन् । ओलीविरुद्ध संयुक्त आन्दोलन हुन नसके प्रतिनिधि सभा पुन:स्थापना नहुने भन्दै दुई नेताले भेटघाट बाक्लो बनाउँदै लगेका हुन्।
प्रधानमन्त्री ओलीले गत पुस ५ गते प्रतिनिधि सभा विघटन गरेपछि प्रचण्ड–नेपाल पक्षको नेकपासहित अधिकांश दलहरु पुन:स्थापनाको पक्षमा आन्दोलनरत छन्। प्रधानमन्त्रीलाई प्रतिनिधि सभा विघटन गर्ने अधिकार संविधानमै नभएको ती दलहरुको जिकिर छ। कांग्रेसले साथ नदिएपछि भट्टराईले प्रचण्डसँग भेटेर संयुक्त आन्दोलनको प्रस्ताव राखेको उनका स्वकीय सचिव रोशन पोख्रेलले बताए।
जसपाको कार्यक्रम सकेर भैरहवाबाट हतारहतार काठमाडौ फर्किएका भट्टराईले शुक्रबारको रत्नपार्कको आमसभापछि प्रचण्डसँग उपराष्ट्रपति निवासमा छलफल गरेका हुन्। भट्टराईले संयुक्त आन्दोलनका साथै प्रचण्ड–नेपाल पक्षले ओलीसँग पूर्ण रुपमा सम्बन्धविच्छेदको प्रस्ताव राखेको पोखरेलले बताए।
‘अहिले अप्ठ्यारो पर्दा ओलीविरुद्ध संयुक्त आन्दोलनमा जान सहमत हुने, तर फेरि त्यहीँ ओलीसँग मिल्न जानुभयो भने ठीक हुँदैन,’ भट्टराईको भनाइ उद्धृत गर्दै उनीनिकट एक नेताले भने, ‘त्यसैले सबैभन्दा पहिले ओलीसँग सम्बन्धविच्छेद गर्नुस्, त्यसपछि संयुक्त आन्दोलनमा जाउँ। मैले खुल्लमखुल्ला भनिसकेको छु, संयुक्त आन्दोलन नभए ओलीतन्त्रविरुद्ध लड्न सकिँदैन ।’
भट्टराईको प्रस्तावलाई समर्थन गर्दै प्रचण्डले आफूहरुको ओलीसँग सम्बन्धविच्छेद गरिसकेकाले संयुक्त आन्दोलनमा जान तयार रहेको बताएको ती नेताले बताए। ‘ओलीविरुद्धको आन्दोलनमा हामी एकल संघर्ष गरेर कहीँ पुगिदैन, त्यसलाई एकीकृत गरेर लैजाउँ,’ दुई नेताबीच छलफलमा भएको कुरा उल्लेख गर्दै ती नेताले भने, ‘अरु यो मुद्धामा मिल्ने पार्टीलाई जोडेर मोर्चा बनाएर आन्दोलन गरौं।’
संयुक्त आन्दोलनमा जानेगरी शुक्रबार बेलुका दुई नेता छुट्टिएको ती नेताले बताए। प्रचण्डसँगको भेटलगत्तै भट्टराईले ट्वीटरमा लेख्दै ओलीविरुद्धको आन्दोलनमा संयुक्त मोर्चा बनाएर जानुपर्ने प्रस्ताव गरेका छन्। ‘ओली प्रतिगमनविरुद्ध नेका, प्रचण्ड–माधव नेकपा र जसपाका एक्लाएक्लै जनप्रदर्शन राम्रै देखिएका छन्। तर, आ–आफ्नो ऐनामा हेरेर मक्ख नपरौं’ ट्वीटरमा लेख्दै बाबुरामले लेखका छन्, ‘आम जनताको वितृष्णा, भूराजनीतिक जटिलता र प्रतिगमनकारी भित्री–बाहिरी सेटिङलाई कम नआकौं, एक्लाएक्लै खाल्डामा जाकिने कि संयुक्त संघर्षको डुंगा चढ्ने, सोचौं।’
राजनीतिमा लामो समय सहकार्य गरेका प्रचण्ड–बाबुरामको भेटलाई धेरैले महत्वका साथ हेरेका छन्। जनयुद्धमा नेतृत्व तहमा रहेका प्रचण्ड–बाबुराम र उपराष्ट्रपति पुनसहितको भेटले संयुक्त मोर्चासँगै एकतामा पुर्याउन सक्ने आँकलन गरिएको छ।
ओलीविरुद्ध संयुक्त मोर्चा बनाउने विषयमा जसपाका नेतासहित प्रचण्डले छलफल गरेका थिए। गत पुस १४ गते उपराष्ट्रपति नन्दबहादुर पुननिवासमा अध्यक्ष प्रचण्डसहित भट्टराई र जसपाकै वरिष्ठ नेता अशोक राईले भेटेर छलफल गरेका थिए। प्रचण्ड–नेपाल पक्षको कार्यक्रम भृकुटीमण्डपमा सकिएपछि उपराष्ट्रपतिसहित चार जना नेताले डिनर गरेर छुट्टिएको स्रोतले जनाएको छ। त्यतिबेला ओलीविरुद्ध संयुक्त मोर्चा बनाएर आन्दोलन गर्ने विषयमा छलफल भएको जनाइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791562069.png)
