काठमाडौं- नेपाली सेनाको हाइयर कमान्ड तथा म्यानेजमेन्ट तालिममा महासेनानी नारायणबहादुर थापा ‘बेस्ट स्टुडेन्ट अफिसर’ बनेका छन्। सैनिक वार कलेज नगरकोटमा असोज ११ गतेदेखि सुरु भएको तालिममा महासेनानी थापा बेस्ट अफिसर बनेका हुन्। शोधपत्रतर्फ भने महासेनानी प्रकाशबहादुर चन्द प्रथम भएका छन्।
शुक्रबार जंगी अड्डास्थित सगरमाथा हलमा प्रधानसेनापति पूर्णचन्द्र थापाले तालिमको समापन गर्दै उत्कृष्ट सैनिक अधिकृतको घोषणा गरेका हुन्।
प्रधानसेनापति थापाले संगठनको भिजन र मिसनका बारेमा साझा बुझाई निर्माण गर्न, नेपालको आफ्नै परिवेश र माटो सुहाँउदो सैनिक रणनीति र नेपाली सेनाको विशिष्ट आवश्यकतालाई परिपूर्ति गर्ने उद्देश्यलाई मध्यनजर गरेर यो तालिमको डिजाइन गरिएको बताए।
प्रधान सेनापति थापाले आफ्नो संवैधानिक दायित्व निर्वाह गर्न नेपाली सेना सदैव तयार रहनु पर्ने बारेमा जोड दिँदै हालसालै जारी भएको राष्ट्रिय सुरक्षा नीतिबाट र यसबाट विकसित हुने राष्ट्रिय प्रतिरक्षा नीति र राष्ट्रिय सैनिक रणनीति नेपाली सेनाको लागि महत्वपूर्ण स्ट्राटेजिक गाइडलाइन्सको रुपमा स्थापित हुने विश्वास व्यक्त गरे।
नेपाली सेनालाई पद्धति र प्रणालीमा आधारित संस्थाको रूपमा विकसित गर्दै लैजानका लागी विगतका उपलब्धिलाई संस्थागत गर्ने तथा वर्तमान र भावी चुनौती सम्बोधन गर्न सबैजना इमान्दार र सिर्जनात्मक हुनु पर्ने बताए।
प्रधानसेनापति थापाले सोही अवसरमा नेपाली सेनाले अघि सारेको '३ प्लस १ अपरेसनल कमान्ड' अवधारणाको आवश्यकता र उपादेयता एवं नेपालको सन्दर्भका यसको महत्वको बारेमा समेत प्रस्ट पारेका थिए।
सेनापति थापाले वर्तमान परिस्थितिबाट विकसित हुन सक्ने सुरक्षा चुनौती बारे सुक्ष्म अनुगमन र मूल्याङ्कन गर्दै संविधानप्रदत्त जिम्मेवारी बहन गर्न आवश्यक समन्वय र तयारी गर्न समेत निर्देशन दिए।
नेपाली सेनामा संचालन हुनै सबैभन्दा उच्च स्तरको उक्त तालिम नगरकोटस्थित नेपाली सैनिक वार कलेजमा २०७१ सालबाट शुरु भएको हो। नेपाली सेनाका महासेनानी दर्जाका अधिकृत मात्र समावेश गरी संचालन गरिने उक्त तालिममा ३० जना महासेनानीहरुको सहभागिता रहेको थियो। महिला सैनिक अधिकृत ५ जना सहित हालसम्म जम्मा २०८ जनाले उक्त तालिम सफलतापूर्वक सम्पन्न गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
