काठमाडौं- नेपाल रेल्वे कम्पनीले १ सय २२ जना ज्यालादारी कर्मचारी राख्ने भएको छ। रेल सेवा सञ्चालनका लागि स्थायी प्रक्रियाबाट कर्मचारी राख्दा ढिलो हुने भएकाले ज्यालादारीमा कर्मचारी भर्ना गर्न लागिएको हो।
कम्पनीको कर्मचारी प्रशासन (सेवा शर्त र सुविधा) विनियमावली अनुसारको प्रक्रियाबाट कर्मचारी पदपूर्ति गर्दा तत्काल रेल सेवा सम्भव नदेखिएकाले ज्यालादारीमा कर्मचारी राख्ने प्रस्ताव गरिएको छ। नेपाल रेल्वे कम्पनीको आगामी बोर्ड बैठकमा ज्यालादारीमा १ सय २२ जना कर्मचारी राख्ने प्रस्ताव कम्पनीका महाप्रबन्धक गुरु भट्टराईले गरेका छन्।
भट्टराईले बोर्ड बैठकका लागि तयार पारेको एजेन्डाको दोस्रो नम्बरमा रेल सेवा सञ्चालनका लागि अपुग आवश्यक कर्मचारी ज्यालादारीमा राख्ने प्रस्ताव गरिएको छ। ‘नेपाल सरकार मन्त्रिपरिषद्बाट स्वीकृत भई आएको कम्पनीको कर्मचारी प्रशासन (सेवा शर्त र सुविधा) विनियमावली बमोजिमको प्रक्रियाबाट पदपूर्ति गरि कर्मचारी व्यवस्थापन गर्न लामो समय लाग्ने देखिएको र कर्मचारीको अभावमा निर्माण कार्य सम्पन्न भएको जयनगर–कुर्था खण्डमा तत्काल रेल सेवा सञ्चालनमा ल्याउन सम्भव नदेखिएकाले स्वीकृत २ सय २६ दरबन्दीभित्रबाट तत्काललाई रेल सेवा सञ्चालनका लागि आवश्यक न्यूनतम पहिचान गरिएका १ सय ७५ जनामध्ये कम्पनीमा हाल कार्यरत र मन्त्रालय/विभागबाट काजमा खटिई आउने कर्मचारीहरु मिलान गरी बाँकी रहेको १ सय २२ जना दहरुमा ज्यालादारी कामदारहरु काममा लगाई रेल सेवा सञ्चालनमा ल्याउनेगरी ज्यालादारी कर्मचारीको व्यवस्थापन सम्बन्धमा छलफल गरी निर्णय लिने सम्बन्धमा,’ भन्ने एजेन्डा रहेको छ।
भारतमा बनेको दुईवटा रेल गत असोजमा जनकपुर आइपुगेको थियो। कर्मचारी व्यवस्थापन, आवश्यक तयारी नहुँदा हालसम्म रेल सञ्चालन हुन नसक्दा रेललाई पालले छोपेर पार्किङमा राखिएको छ। कुर्था–जनकपुर–जयनगर रेल्वे सेवा सञ्चालनका लागि भारतबाट २ सेट रेल सेट र ४ वटा इन्जिन जनकपुर ल्याइएको हो। नेपाल ल्याइएका दुई रेल सेट भारतको कोंकण रेल कर्पोरेशन कम्पनी लिमिटेडले उपलब्ध गराएको थियो।
भारतको जयनगरबाट जनकपुर हुँदै कुर्थासम्म ३४ किलोमिटरमा गत वर्षको मंसिर पहिलो सातामै लिक परीक्षण भएलगत्तै रेल सेवा सञ्चालन गरिने चर्चा थियो। रेल्वे कम्पनीले गएको पुस अन्तिम साता रेल सेवाको भाडा निर्धारण समेत गरिसकेको छ।
जयनगरदेखि कुर्थासम्म ३५ किलोमिटरको भाडा जनरल बोगीमा ७० रुपैयाँ र एसी बोगीमा ३०० रुपैयाँसम्म तोकिएको छ। रेल चढ्दा प्रतिकिलोमिटर बढीमा १५ रुपैयाँ जनरल बोगीमा र एसीमा जनरलभन्दा पाँच गुणा बढी भाडा तोकिएको छ।
एक स्टेसनबाट अर्को स्टेसनमा झरेको खन्डमा प्रतिकिलोमिटर १५ रुपैयाँको दरले भाडा लाग्ने कम्पनीले जनाएको छ। दुई वा दुईभन्दा बढी स्टे्सनसम्म यात्रा गरे त्योभन्दा कम भाडा लाग्ने व्यवस्था गरिएको छ। कुर्थादेखि जयनगरसम्म जयनगर, इनर्वा, खजुरी, वैदही र कुर्था गरी पाँचओटा स्टेसन राखिएको छ।
सरकारले ८६ करोड रुपैयाँमा दुई सेट डेमो ट्रेन खरिद गरेको हो। प्रधानमन्त्री केपी शर्मा ओलीले रेललाई आफ्नो ‘ड्रिम प्रोजेक्ट’को रूपमा चित्रण गर्दै आएका छन्। कर्मचारी पदपूर्ति नहुँदा हालसम्म रेल सेवा सञ्चालनमा आउने भने सकेको छैन। पछिल्लो पटक रेल्वे कम्पनीले यही माघ भित्र रेल सेवा सञ्चालनमा ल्याउने दाबी गरेको छ।
बिहीबार रेल्वे कम्पनीले बोर्ड सदस्यहरुलाई आगामी बैठकको एजेन्डा पठाएको थियो। कम्पनीको बोर्ड बैठक छिट्टै बस्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
