काठमाडौं- नेपाल पुलिस क्लबले प्रधानमन्त्री कप राष्ट्रिय पुरुष एकदिवसीय अन्तर्राष्ट्रिय क्रिकेट प्रतियोगितामा लगातार दोस्रो जित निकालेको छ। बिहीबार भएको खेलमा पुलिसले लुम्बिनी प्रदेशलाई ७४ रनले पराजित गरेको हो।
३११ रनको विशाल चुनौती पछ्याउँदै ब्याटिङ गरेको लुम्बिनी प्रदेशले निर्धारित ५० ओभरमा सात विकेटको क्षतिमा २३६ रन मात्र बनाउन सक्यो। लुम्बिनीका लागि सौरभ खनालले ६० बलमा ६ छक्का र पाँच चौका प्रहार गर्दै ७४ रन बनाए। त्यस्तै, देव खनालले ४९ रन बनाउँदा सन्दीप रजालीले ४० रन बनाए।
आठौं नम्बरमा ब्याटिङ गर्न आएका कप्तान कृष्ण कार्कीले २४ बलमा पाँच छक्का प्रहार गर्दै अविजित ४० रन बनाए। बलिङतर्फ पुलिसका राशिद खान र पवन सर्राफले समान २–२ विकेट लिए।
सुनीलको शतक, दीपेन्द्र र पवनको अर्धशतक
यसअघि त्रिवि क्रिकेट मैदानमा टस हारेर पहिले ब्याटिङ गरेको पुलिसले निर्धारित ५० ओभरमा चार विकेटको क्षतिमा ३१० रन बनायो। पुलिसको उच्च स्कोरमा सुनील धमलाले शतक बनाउँदा दीपेन्द्रसिंह ऐरी र पवन सर्राफले अर्धशतक बनाए।
प्रधानमन्त्री कपमा आफ्नो पहिलो शतक बनाउने क्रममा सुनीलले १४२ बलको सामना गरे। अनिल खरेलको बलमा आउट हुनुअघि सुनीलले १४५ बलको सामना गर्दै सात चौका र एक छक्कासहित १०४ रन बनाए। जारी प्रधानमन्त्री कपमा यो दोस्रो शतक हो।
यसअघि आर्मीका कप्तान विनोद भण्डारीले गण्डकी प्रदेशविरुद्ध शतक बनाएका थिए। विनोदले गण्डकीविरुद्ध ७६ बलमा ९ चौका र ५ छक्का प्रहार गर्दै अविजित १११ रन बनाएका थिए।
त्यस्तै, दीपेन्द्रले ६१ बलमा ६ छक्का र एक चौका प्रहार गर्दै ८६ रन बनाए। अमित श्रेष्ठ र आरिफ शेखले अविजित २९ रन बनाउँदा छैटौं नम्बरमा ब्याटिङ गर्न आएका पवनले विष्फोटक ब्याटिङ गरे। पवनले मात्र १३ बलमा ६ छक्का र एक छौका प्रहार गर्दै अविजित ५० रन बनाए। पवनले अन्तिम ओभरमा मात्रै २८ रन बनाए। उनले लुम्बिनीका बलर सौरभ खनाललाई लगातार तीन बलमा छक्का प्रहार गरेका थिए। चौथो र पाँचौ बलमा २–२ रन लिएका पवनले छैटौं बलमा फेरि छक्का प्रहार गर्दै अन्तिम ओभरमा मात्रै २८ रन जोडे।
बलिङतर्फ कृष्ण कार्की, अनिल खरेल, सन्दीप सुनार र सौरभ खनालले समान १–१ विकेट लिए। पुलिसको यो आफ्नो तेस्रो खेलमा दोस्रो जित हो।
पहिलो खेलमा बागमती प्रदेशसँग सात विकेटको हार ब्यहोरेको पुलिसले आफ्नो दोस्रो खेलमा भने सुदूरपश्चिम प्रदेशलाई ९ विकेटले हराएको थियो। यता, लुम्बिनी प्रदेशको भने यो दोस्रो खेलमा पहिलो हार हो। यसअघि प्रदेश २ लाई लुम्बिनीले ७७ रनले पराजित गरेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751372795.jpg)
-1764146706.png)
