काठमाडौं– टोखा नगरपालिका अन्तर वडा स्तरीय गजराज जोशी स्मृति कप फुटबल प्रतियोगितामा वडा नम्बर २ र ३ ले विजयी सुरुवात गरेको छ।
प्रतियोगिताको तेस्रो दिन बुधबार वडा नम्बर ३ ले वडा नम्बर ६ माथि १–० को जित निकालेको हो। टोखास्थित भुतखेल मैदानमा वडा नम्बर ३ को जितमा विजय महर्जनले गरेको गोल नै निर्णायक बन्यो। उनले १८औं मिनेटमा गोल गरेका थिए।
बुधबार नै भएको खेलमा वडा नम्बर २ ले वडा नम्बर १ माथि १–० कै जित निकाल्यो। अन्तिम समयमा सरोज श्रेष्ठले गरेको गोल नै वडा नम्बर २ को जितमा निर्णायक बन्यो। कप्तान ईश्वर राज जोशीको फ्रिकिक रिवाउन्ड भएर फर्कदा सरोज श्रेष्ठले गोल गर्न सफल भए।
प्रतियोगितामा टोखा नगरपालिकाका ११ वडामध्ये ७ वटा वडाको सहभागिता रहेको छ। लिगकम नकआउटको आधारमा भएको प्रतियोगितामा सहभागी टोलीलाई दुई समूहमा विभाजन गरिएको छ। पोल ‘ए’ मा वडा नम्बर ३, ६ र ७ तथा पोल ‘बी’ मा १, २, ४ र ८ वडा रहेको छ। एसडी ९९ स्पोर्टस् कर्नरको आयोजनामा भएको प्रतियोगितामा बिहीबार दुई खेल हुनेछ। वडा नम्बर ८ र ४ तथा वडा नम्बर ७ र ३ बीच प्रतिस्पर्धा हुनेछ।
प्रतियोगिता १३ माघसम्म चल्नेछ। प्रतियोगिताको विजेताले ७० हजार, दोस्रो हुने टोलीले ३५ हजार रुपैयाँ प्राप्त गर्नेछन्। विधागत उत्कृष्ट खेलाडीले समान ५ हजार रुपैयाँ पुरस्कार प्राप्त गर्नेछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1787821306.jpg)
-1786513116.png)
