काठमाडौं– मालपोत कर्मचारीकै मिलेमतोमा नक्कली जग्गाधनी खडा गरेर जग्गा बिक्री भएको पाइएको छ। उक्त कार्यमा संलग्न भएको आरोपमा महानगरीय प्रहरी परिसर काठमाडौंले मालपोतका दुई कर्मचारीलाई पक्राउ गरेको छ।
मालपोत कार्यालय कलंकीमा शाखा अधिकृत पदमा कार्यरत दीपक दाहाल र सोही कार्यालयका नासु नारायण श्रेष्ठलाई पक्राउ गरिएको हो।
उनीहरुकै मिलेमतोमा नक्कली जग्गाधनी खडा गरी जग्गा बिक्रि भएको पाइएको परिसर काठमाडौंले जनाएको छ। मीना खड्काको नाममा रहेको थानकोटको २० आना जग्गा नक्कली जग्गाधनी खडा गरी गत वर्षको पुष २३ गते ७२ लाखमा बिक्री भएको थियो।
वास्तविक जग्गाधनी खड्का भने त्यसबेला बेल्जियममा थिइन्। उनको ठाउँमा अर्कै व्यक्तिलाई नक्कली जग्गाधनी बनाई पूर्जा र नागरिकतासमेत देखाई बिक्री गरेको अनुसन्धानबाट खुलेको छ।
शाखा अधिकृत दाहालले नासु श्रेष्ठलाई डोर खटाई कलंकी चोकस्थित एक होटलमा बसी राजीनामा लिखत पास गराई नामसारी गराएका थिए।
राजीनामा पास भएको केही दिनमा वास्तविक जग्गाधनी मीना खड्का बेल्जियम रहेको थाहा पाएपछि मालपोत कार्यालय कलंकीमा रहेको जग्गाधनी जग्गा दर्ता श्रेष्तामा केरमेट गरी सच्याएर नामसारी समेत बदर गरेको अुनसन्धानबाट खुलेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
