विभागको निर्देशनपछि घट्ला त खानेतेलको मूल्य?

अर्थ समाचार

नेपाल लाइभ बुधबार, माघ ७, २०७७ १८:०५

काठमाडौं- बजारमा पछिल्लो समय खाने तेलको मूल्य आकाशिएको छ। २ महिनाअघिको तेलको मूल्यसँग अहिले तुलना गर्दा प्रतिलिटर ५० रुपैयाँसम्म वृद्धि भएको पाइएको छ। तोरीको तेलमा प्रतिलिटर ४० देखि ५० रुपैयाँसम्म बढेको छ। सनफ्लावरको तेल पनि प्रतिलिटर ४० रुपैयाँकै हाराहारीमा मूल्य वृद्धि भएको छ। भटमासको तेल पनि प्रतिलिटर २० देखि ३० रुपैयाँसम्म बढेको छ। तेल उत्पादन गर्ने उद्योगीले भने खाने तेलको उत्पादन गर्ने कच्चा पदार्थमा मूल्य वृद्धि भएकाले बजारमा तेलको मूल्य वृद्धि भएको बताउँदै आएका छन्।

बजारमा खानेतेलको मूल्य मनलाग्दी बढाइएको गुनासो बढेसँगै वाणिज्य, आपूर्ति तथा उपभोक्ता संरक्षण विभागले अनुगमन थालेको छ।

खाने तेलको मूल्य वृद्धिका सम्बन्धमा अनुगमनका क्रममा विभागले बाराका दुईवटा उद्योगहरुले उत्पादन लागतको अनुपातमा अत्यधिक मूल्य कायम गरी बिक्री गरेको अवस्थामा फेला पारी दुई उद्योगलाई जरिवाना गरेको छ।

तेलको मूल्य बढाएर बिक्री वितरण गरेको पुष्टि भएसँगै बारका अन्नपूर्णा भेजिटेबल प्रालि र महालक्ष्मी सोल्भेन्ट एण्ड रिफाइनरी प्रालिलाई वाणिज्य, आपूर्ति तथा उपभोक्ता हित संरक्षण विभागले ६ लाख जरिवाना गरेको हो। यी उद्योगहरुले उपभोक्ता संरक्षण ऐन, २०७५ को दफा १६ (२) (क) विपरीत खाने तेल बिक्री वितरण गरेको पाइएकोले जरिवाना गरिएको विभागले उल्लेख गरेको छ।

अन्नपूर्णा भेजिटेबल प्रालिले अमृत ब्राण्डका तोरी, सनफ्लावर तथा भटमासको तेल मूल्य बढाएर बिक्री गरेको पाइएकाले कारबाही प्रकृया अगाडि बढाइएको वाणिज्य, आपूर्ति तथा उपभोक्ता संरक्षण विभागका निर्देशक एंव प्रवक्ता शिवराज सेढाईले बताए।

उनका अनुसार महालक्ष्मी सोल्भेन्टले भने महालक्ष्मी सोयाबिन नामक तेलको मूल्य उत्पादन लागतभन्दा बढाएको पाइएको थियो।

‘सोधपुछका क्रममा उद्योगीले कच्चा पदार्थ पैठारीको लागत वृद्धि भएका कारण तेलको मूल्य बढाउन परेको दावी गरेका थिए। तर अनुगमनका क्रममा दुवै उद्योगले उत्पादन लागत तथा गुणस्तरअनुसार भन्दा बढी मूल्य कायम गरेको अनुगमनका क्रममा फेला परेको थियो,’ विभागका प्रवक्ता सेढाईले नेपाल लाइभसँग भने।

विभागले ती दुई उद्योगहरुलाई अस्वभाविक रुपमा बढाइएको मूल्य वृद्धि सच्याउनसमेत निर्देशन दिएको छ। तर बजारमा सबै तेलको मूल्य उस्तै गरी बढिरहेको अवस्थामा यी दुई उद्योगहरुले विभागको निर्देशन पालना गरी बढाइएको मूल्य घटाउलान् त? भन्ने प्रश्न खडा भएको छ। यी उद्योगहरुले निर्देशनको पालना गर्नैपर्ने र नभएको अबस्थामा प्रचलित कानुनअनुसार कारबाही हुने विभागका निर्देशक सेढाई बताउँछन्। तेलको मूल्य अत्यधिक चर्किएकाले यसमा थप अनुसन्धान हुने उनको भनाइ छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society. http://nepallive.com

लेखकबाट थप

शिक्षक आन्दोलन : तीन दिनभित्र शिक्षकका जायज माग पूरा गरी विद्यालय फर्काउने वातावरण सुनिश्चित गर्न सर्वोच्चको आदेश

रुकुम पूर्व केन्द्रविन्दु भएर भूकम्प

भुटानी शरणार्थी मुद्दामा सर्वोच्च : अमेरिका जानुअघिको शिविरमा राख्नू, ६० दिनभित्र अनुसन्धान सक्नू