काठमाडौं- नेपालमा तीन जनामा नयाँ प्रजातिको कोरोना भाइरसको संक्रमण भएको पुष्टि भएको छ।
स्वास्थ्य तथा जनसंख्या मन्त्रालयका प्रवक्ता डा जागेश्वर गौतमले तीन जनामा नयाँ प्रजातिको कोरोना भाइरस संक्रमण भएको जानकारी दिएका हुन्।
डा गौतमका अनुसार २८ वर्षीया महिला र ६७ र ३२ वर्षीय पुरुषमा नयाँ प्रजातिको कोरोना पुष्टि भएको हो।
बेलायतमा देखिएको कोरोना भाइरसको नयाँ भेरियन्ट लाइनएज बि.१.१.७ वा २०बि/५०१ वाइ.भि वान भएको पुष्टि भएको प्रवक्ता डा गौतमले बताएका छन्।
नयाँ प्रजातिको संक्रमण देखिएका तीनै जना पुस महिनामा बेलायतबाट नेपाल आएका थिए।
बेलायतबाट पुस १ गतेपछि नेपाल आएका २७७ जनामध्ये ६ जनामा गरिएको कोरोना परीक्षणमा 'एस जीन टार्गेट नेगेटिभ' थियो। उनीहरुमा नयाँ प्रजातिको कोरोना भाइरस संक्रमण हुनसक्ने आशंका गर्दै पुस २७ गते उनीहरूबाट संकलन भएको नमुना विश्व स्वास्थ्य संगठनको सहयोगमा हङकङ पठाइएको थियो । ६ जनाको नमूना हङकङमा परीक्षा गर्दा ३ जनामा नयाँ प्रजातिको कोरोना भाइरस संक्रमण देखिएको पुष्टि भएको हो ।
नयाँ प्रजातिको कोरोना संक्रमण देखिएका तीन जनाकै स्वास्थ्य अवस्था भने सामान्य भइसकेको स्वास्थ्य मन्त्रालयले जनाएको छ।
उनीहरुमध्ये २८ वर्षीया महिला र ३२ वर्षीय पुरुषमा कोरोना नेगेटिभ भैसकेको र ६७ वर्षीया पुरुषमा कोरोना पोजेटिभ भएपनि कुनै लक्षण नभएको स्वास्थ्य मन्त्रालयले जनाएको छ।
नयाँ प्रजातिको कोरोना संक्रमण देखिएको पुष्टि भएपछि स्वास्थ्य मन्त्रालयले कोरोना संक्रमणको रोकथामका लागि नेपालमा भ्याक्सिन उपलब्ध नहुँदासम्म कोरोना संक्रमणबाट बच्न विशेष सावधानी अपनाउन स्वास्थ्य मन्त्रालयले सचेत गराएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791271370.png)
-1786602170.png)
