काठमाडौं- सरकारले २१ वर्षदेखि बन्द रहेको मझगाउँ विमानस्थल पुनः सञ्चालन गर्न मर्मत गर्ने भएको छ। सुदूरपश्चिम प्रदेश कञ्चनपुरको भीमदत्त नगरपालिकामा अवस्थित मझगाउँ विमानस्थलको मर्मतका लागि स्थानीय, प्रदेश र केन्द्र सरकार साझेदारीमा काम अगाडि बढाइने भएको हो।
यो विमानस्थल २०५६ सालदेखि बन्द छ। भारतीय सीमा नाका नजिक रहेको विमानस्थल सुरक्षाको कारण देखाउँदै बन्द गरिएको थियो।
पुनः सरकारले ३० करोड रुपैयाँको लागतमा विमानस्थल मर्मत गरी सञ्चालनमा ल्याउने तयारी गरेको नेपाल नागरिक उड्डयन प्राधिकरणका महानिर्देशक राजन पोखरेलले जानकारी दिए।
‘विमानस्थल विस्तारमा स्थानीय, प्रदेश र केन्द्रको संयुक्त लागनी हुन्छ,’ पोखरेलले भने, ‘पूर्वमा भारतीय सीमा नजिक रहेको भद्रपुर विमानस्थल अहिले पनि सञ्चालनमा छ। सुदुरपश्चिमको विमानस्थल पनि सञ्चालन गर्नु आवश्यकता हो।’
प्राधिकरणले अहिले विमानस्थल विस्तारमा स्थानीय तह र प्रदेश सरकारको सहयोगमा काम गर्ने गरी सम्झौता गर्दै पनि आएको छ।
केही महिना अगाडि मात्रै सुर्खेत विमानस्थल र विराटनगर विमानस्थल विस्तारमा समेत प्रदेश र स्थानीय तहको समेत लगानी रहने गरी प्राधिकरणले दुई पक्षीय सम्झौता गरिसकेको छ।
सोही अवधरणाअनुसार मझगाउँ विमानस्थलको मर्मत तथा विस्तार गरेर सञ्चालनमा ल्याइने पोखरेलले जानकारी दिए।
विमानस्थलको पुरानो रन-वे १६ सय मिटरको छ। तर, रन-वे अहिले घाँसे मैदानको रुपमा परिणत भएको छ।
रन-वेको पिच गर्दै विमानस्थल सञ्चालनमा ल्याइने पोखरेलले जानकारी दिए। साथै ६५ बिघा क्षेत्रफलमा फैलिएको विमानस्थल विस्तारमा थप जग्गा समेत आवश्यक पर्ने प्राधिकरणको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
