काठमाडौं- सरकारले चालु आर्थिक वर्षको पहिलो ६ महिनामा १५ प्रतिशत पनि पुँजीगत खर्च गर्न सकेको छैन। महालेखा नियन्त्रक कार्यालयका अनुसार आर्थिक वर्षको साउनदेखि पुस मसान्तसम्मको अवधिमा १४.४० प्रतिशत पुँजीगत खर्च भएको छ।
महालेखाका अनुसार यो अवधिमा जम्मा ५० अर्ब १८ करोड रूपैयाँ पुँजीगत शीर्षकको रकम भुक्तानी भएको छ। चालु आर्थिक वर्षमा ३ खर्ब ५३ अर्ब रूपैयाँ पुँजीगत खर्चको लक्ष्य राखिएको भए पनि आर्थिक वर्षको आधा समय सकिँदासम्म सरकारी खर्चको स्थिति नाजुक छ।
यस अवधिमा वित्तीय व्यवस्थातर्फ जम्मा १३ प्रतिशत खर्च भएको छ। वित्तीय व्यवस्थाअन्तर्गत सरकारले सार्वजनिक संस्थानमा सेयर र ऋण लगानी गर्ने गरेको छ। वित्तीय व्यवस्थातर्फ १ खर्ब ७२ अर्ब रूपैयाँ खर्चने लक्ष्य राखिएकोमा अहिलेसम्म २२ अर्ब ५७ करोड रूपैयाँमात्रै भुक्तानी भएको छ।
सरकारले चालु खर्चतर्फ भने ३ खर्ब ४२ अर्ब रूपैयाँ भुक्तानी दिएको छ। यो रकम कूल विनियोजनको २८.१९ प्रतिशत हो। चालु आर्थिक वर्षमा ९ खर्ब ४८ अर्ब रूपैयाँ चालु खर्च विनियोजन गरिएकोमा अहिलेसम्म ३ खर्ब ४२ अर्ब रूपैयाँ खर्च भएको महालेखा नियन्त्रकको प्रतिवेदनमा उल्लेख छ।
राजस्वतर्फ आर्थिक वर्षको पहिलो ६ महिनामा लक्ष्यभन्दा २५ अर्ब रूपैयाँ कम संकलन भएको छ। आर्थिक वर्षको पहिलो ६ महिनामा ४ खर्ब ५० अर्ब रूपैयाँ संकलन भएको छ। पुस मसान्तसम्म ४ खर्ब ७५ अर्ब रूपैयाँ संकलन गर्ने लक्ष्य सरकारको थियो।
यो अवधिमा कर राजस्वतर्फ ३ खर्ब ८६ अर्ब रूपैयाँ र गैरकर राजस्वतर्फ ३५ अर्ब ७० करोड रूपैयाँ संकलन भएको छ। अन्य प्राप्ति २७ अर्ब ८२ करोड रूपैयाँ उठेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
