काठमाडौं- सिराहाको गोलबजारमा जारी १०औं पुष्पलाल स्मृति राष्ट्रिय र्याङकिङ ब्याडमिन्टन प्रतियोगिताको पुरुष र्याङकिङ १६ तथा महिला र्याङकिङ १२ को क्वाटरफाईनल समीकरण पूरा भएको छ।
पुरुषको लिग प्रतियोगिताबाट समूह 'ए'बाट सेनाका रत्नजित तामाङ र एपिएफका गौतम कठायत पहिलो र दोस्रो हुँदै क्वाटरफाईनल प्रवेश गरेका हुन्। अब रत्नले समूह सीको दोस्रो स्थानमा रहेका भोजपुरका विकास श्रेष्ठसँग प्रतिस्पर्धा गर्ने छन्। रत्नले लिगमा ३ मा तीन खेलनै जित्दै समूह विजेता भएका हुन्। यस्तै तीनमा दुई खेल जित्दै उपविजेता भएका गौतमले समूह सिका विजेता सेनाका प्रफुल महर्जनको सामना गर्ने भएका छन्। प्रफुलले ३ मा तीन खेलमा नै जित्दा विकासले तीनमा दुई खेल जिते।
यस्तै समूह बी बाट एपिएफका दीपेश धामी र सेनाका नविन श्रेष्ठ विजेता र उपविजेता बन्दै क्वाटरफाईनल प्रवेश गरे। दीपेशले तीनमा तीन खेलमै विजयी भएर विजेता समूह विजेता बनेका थिए भने नविनले एक खेल गुमाएका थिए। अब दीपेशले समूह डीका उपविजेता रुकेश महर्जनसँग प्रतिस्पर्धा गर्नेछन्।
रुकेशले आफ्नो समूहमा तीनमा दुई जित निकाल्दै समूह उपविजेता बनेका हुन्। यस्तै समूह डीका विजेता सिल्क ग्रुपका प्रिन्स दाहालले समूह बीका उपविजेता सेनाका नविन श्रेष्ठसँग प्रतिस्पर्धा गर्नेछन्।
पुरुष र्याङकिङ १६ को बिहीबार भएको अन्तिम लिगमा एपिएफका गौतम कठायतल एपिएफकै सुमन लिम्बुलाई २१–९, २१–८ ले, पुलिसका सुनिल जोशीले बाँकेका इफ्रान अन्सारीलाई २१–१८, २१–१६ ले, सेनाका प्रफुल महर्जनले एपिएफका बिजित थापामगरलाई २१–१६, २३–२१ ले, सेनाका रुकेश महर्जनले पुलिसका जीवन आचार्यलाई २५–२३, २१–६ ले, सेनाका रत्नजित तामाङले धादिङका सुदीप सेंढाईलाई २१–११, २१–११ ले, एपिएफका दिपेश धामीले सेनाका नविन श्रेष्ठलाई २१–११, २१–१७ ले, भोजपुरका विकाश श्रेष्ठले पुलिसका दीपक बोहरालाई २१–१५, २१–१२ ले तथा सिल्क ग्रुपका प्रिन्स दाहालले एपिएफका साजन कृष्ण ताम्राकारलाई २१–८, २१–९ ले पराजित गरे।
प्रतियोगिताको महिला र्याङकिङ १२ बाट समूह ए मा भोजपुरकी नङशलदेवी तामाङ र बिराट ब्याडमिन्टन क्लबकी सिमा राजवंशी विजेता तथा उपविजेताको रुपमा क्वाटरफाईनल प्रवेश गरे। अब नङशलदेवीले समूह 'सी'की उपविजेता एपिएफकी शोभा गौचनको सामना गर्ने छिन्। नङशलदेवीले समूहमा शतप्रतिशत जित निकालेकी थिइन्।
त्यस्तै राजवंशीले समूह 'सी'की विजेता राष्ट्रिय च्याम्पियन सेनाकी रशिला महर्जनको सामना गर्नेछिन्। समूह बीबाट सेनाकी अमिता गिरी र एपिएफकी सुनयना मुखिया विजेता तथा उपविजेता बन्दै क्वाटरफाईनल प्रवेश गरे। अमिताले समूह डीकी उपविजेता अनुमाया राई र सुनयनाले एपिएफकी जेशिका गुरुङको सामना गर्ने छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
