काठमाडौं- चन्द्रागिरि हिल्स लिमिटेडले आफ्नो प्रारम्भिक सेयर निष्काशनमा आवेदन दिनेलाई केबलकारमा २५ प्रतिशत छुट दिने निर्णय गरेको छ। कम्पनीले वार्षिक साधारणसभाको अवसरमा यो घोषणा गरेको हो।
कम्पनीले केही दिनअघि सर्वसाधारणका लागि सेयर निष्काशन गरेको थियो। यसको बाँडफाँट हुने भने बाँकी छ। कम्पनीको सेयरमा १२ लाख ५६ हजार ७४६ जनाले आवेदन दिएका थिए।
यो छुट माघ ५ गतेबाट सुरु भइ एक वर्षसम्म कायम हुने कम्पनीको भनाइ छ। यसका लागि सेयरमा आवेदन दिएको प्रमाण बुझाउनुपर्ने कम्पनीको भनाइ छ।
चन्द्रागिरि हिल्स लिमिटेडको ११औं वार्षिक सधारणसभा २०७७ साल पौष २९ गते बुधबारका दिन चन्द्रगिरि हिल्स रिर्सोटमा सम्पन्न भएको छ। कम्पनीका अध्यक्ष चन्द्रप्रसाद ढकालको सभापतित्वमा सम्पन्न साधारणसभामा कम्पनीको वित्तीय अवस्था, मुख्य उपलब्धि तथा कम्पनीको भावी योजना प्रस्तुत गरिएको थियो।
ऐतिहासिक, सांस्कृतिक तथा प्राकृतिक महत्त्व बोकेको चन्द्रागिरि डाँडामा कम्पनीले भालेश्वर महादेव मन्दिर, सत्तल, भ्यू टावर, चिल्ड्रेन पार्क, सेमिनार हल तथा रिर्सोटलगायतका पूर्वाधार निर्माण गरेर चन्द्रागिरि डाँडालाई एकीकृत पर्यटकीय गन्तव्यको रुपमा विकास गरिरहेको जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
