काठमाडौं- स्पेनिस सुपर कपमा आफूहरुलाई उपाधिको दाबेदारका रुपमा नहेरिएको बार्सिलोनाका प्रशिक्षक रोनाल्ड कोम्यानले बताएका छन्। स्पेनिस सुपर कपमा बुधबार राति पौने २ बजे हुने सेमिफाइनल खेलमा बार्सिलोनाले रियल सोसिडाडसँग खेल्दैछ। खेलअघि प्रशिक्षक कोम्यानले आफूहरु सुपर कपको रोजाइँमा पर्ने टिम नरहेको बताएका हुन्।
ला लिगामा पछिल्ला आठ खेलमा अपराजित रहँदै लयमा फर्केको बार्सिलोनामा सुपर कपअघि टिममा आत्मविश्वास बढेको देखिन्छ। सुपर कोपाको नतिजाले लिग खेलका साथै कोपा डेल रेमा बढ्नका लागि समेत महत्वपूर्ण हुनेछ। सुपर कपको दोस्रो सेमिफाइनलमा बिहीबार राति रियल मड्रिड र एथ्लेटिक क्लब खेल्दैछन्।
‘टिमले पछिल्लो समय देखाएको लयले सुपर कपमा राम्रो हुनेछ भन्न सकिँदैन। मेरा लागि त सुपर कप यसैले जित्न सक्नेछ भन्ने रोजाइँको टिम पनि अहिले देखिँदैन। सुपर कपमा अहिले चारै टिम उस्तै हुन्। हामी राम्रो लयमा छौँ भनेर देखाउने अवसर भने हुनेछ’ प्रशिक्षक कोम्यानले भनेका छन्।
गएको लिग खेलमा ग्रानडाविरुद्ध ४–० को जित निकाल्दा कप्तान लियोनल मेस्सीसहित फ्रान्की डि योङ, सर्जिनियो डेस्ट सामान्य चोटमा रहन पुगेको कोम्यानले बताएका छन्। त्यसका साथै ग्रानडाविरुद्धको खेलअघि अभ्यासमा चोट लागेका रोनाल्ड आरुखो पनि लयमा आइसकेका छैनन्। त्यसबाहेक अन्सु फाती, जेरार्ड पिके, फिलिप कोउटिन्हो, सर्जी रोबर्टो, म्याथुज फर्नान्डेस चोटका कारण नै बाहिर छन्।
यस्तोमा पनि टिम विश्वस्त रहेको र खेलाडीहरुमा आत्मविश्वास रहेको प्रशिक्षक कोम्यानले बताएका छन्। मिडफिल्डर डि योङले पनि टिममा अहिले आफू राम्रो अवस्थामा रहेको बताएका छन्। ‘अहिले म राम्रो अनुभव गरिरहेको छु। पछिल्ला खेलमा फरक भूमिकामा खेलिरहेको छु, प्रशिक्षकले मलाई थप अट्याकमा बढ्न भन्नुभएको छ’ डि योङले भनेका छन्।
अर्का मिडफिल्डर सर्जियो बुस्केट्सले समेत बार्सिलोना टिम अहिले एकजुट र बलियो रहेको बताएका छन्। ग्रानडाविरुद्धको खेलपछि उनले टिममा खेलको लय देखिएको र सबैमा आत्मविश्वास बढेको बताएका थिए।
ला लिगामा बार्सिलोना १८ खेलमा ३४ अंकसहित तेस्रो स्थानमा रहेको छ। बार्सिलोनाभन्दा अघि शीर्ष स्थानमा रहेको एथ्लेटिको मड्रिडको १६ खेलमा ४१ अंक र दोस्रोमा रहेको रियल मड्रिडको १८ खेलमा ३७ अंक रहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789632334.jpeg){kind=spacer}
-1789631269.jpg)
-1786602170.png)
